پاکستان وچ اپنے آپ نُوں غیر محفوظ تصور نہیں کیتا٭پاکستان وچ اِک ہفتے دے قیام دوران بہت چنگا لگا:: کرس لین   ٭ رویل نیوز

لاہور (نمائندا رویل) پاکستان سپر لیگ فائیو لئی لاہور قلندرز دی ٹیم وچ شامل آسٹریلوی بلے باز کرس لین نے کہیا اے کہ پاکستان وچ اِک ہفتے دے قیام دے دوران بہت لطف اندوز ہویا آں تے کسے وی موقع اُتے اپنے آپ نُوں غیر محفوظ تصور نہیں کیتا۔ آسٹریلیا نال تعلق رکھن والے کرس لین نے ملتان سلطانز دے خلاف پہلے میچ وچ تے 19 گینداں اُتے 3 چھکیاں تے چار چوکیاں دی مدد نال 39 سکور بنائے جد کہ دوجے میچ وچ اوہ اسلام آباد یونائیٹڈ دے خلاف صرف 11 سکور ای بنا سکے سن۔ اِک انٹرویو وچ کرس لین نے کہیا کہ اوہناں نُوں پاکستان آئے ہوئے اِک ہفتا ہو گیا اے‘ ایس اِک ہفتے وچ بہت لطف اندوز ہویا آں‘ دو وار گالف وی کھیڈن گیا تے دو میچاں وچ ای شکست ہوئی پر لیگ وچ انج ہو جاندا اے‘ سانوں ایس ویلے اِک جت دی کھوج اے تاں جے اسیں فتح دے راہ اُتے آ سکیے۔