کرونا وائرس خلاف وفاقی تے صوبائی حکومتاں نوں اِ ک مِک ہو کے کم کرنا چاہیدا اے: شہباز شریف _____ رویل نیوز

لاہور (این ایل آئی) پاکستان مسلم لیگ (ن) دے صدر تے قومی اسمبلی وچ قائد حزب اختلاف شہباز شریف نے کرونا وایرس نال نبڑن لئی ہنگامی اقدامات کرن دا مطالبا کردیاں ہویاں کہیا کہ پاکستان وچ کرونا وایرس نال نبڑن لئی ہنگامی‘ ٹھوس تے سنجیدا اقدامات کیتے جان۔ موجودا حکومت کرونا وایرس دے معاملے اُتے ڈینگی‘ پولیو والی مجرمانا لا پرواہی وکھا رہی اے جو خطرناک اے۔ پاکستانیاں دی حفاظت لئی وفاقی تے صوبائی حکومتاں دے اکٹھےعمل نال حکمت عملی بنائی جاوے۔ اوہناں نے کہیا کہ کرونا وایرس توں بچاء دیاں حفاظتی تدبیراں لئی قومی حکمت عملی وضع کرنا ویلے دی اہم ترین ضرورت اے‘ فوری طور اُتے چین دی طرز اُتے پورے ملک وچ طبی علاج گاہواں دی تیاری شروع کیتی جاوے جہڑی لوڑ پین اُتے کم آ سکے۔ خطرناک کرونا وایرس نُوں روایتی بیان بازی دی نذر کرنا بہت وڈی حماقت ہووے گی۔ پاکتان دے بہترین ڈاکٹرز‘ ماہرین تے محققین اُتے مشتمل خصوصی ٹاسک فورس بنائی جاوے۔ وفاقی تے صوبائی سطح اُتے مانیٹرنگ تے سفارشاں دی تیاری دا طریقا کاربنایا جاوے۔ وفاقی تے صوبائی حکومتاں دے وچکار اشتراک عمل لئی نظام مرتب کیتا جاوے تاں جے مربوط ایکشن ہو سکے۔اپوزیشن لیڈر میاں شہباز شریف نے ہور کہیا کہ محمد نواز شریف دی زندگی پاکستانی لوکائی دی امانت اے‘ ایہدے وچ کسے نُوں خیانت نہیں کرن دواں گے۔ اوہناں دی صحت دا ہر ممکن خیال رکھ رہے آں‘ اوہناں دا علاج پہلی ترجیح اے‘ اللہ تعالیٰ مہربانی فرمان گے۔