غزل

سُنج مسنجا منظر بن کے رہنے آں
ہسدے گھر وچ پتھر بن کے رہنے آں
ساڈے ہتھوں سبھ دُعاواں ڈِگ پئیاں
کالی جِبھ دے اکھر بن کے رہنے آں
ساڈی بارش لُٹن والیو یاد رہوے
دھرتی وچ سمندر بن کے رہنے آں
ہاسے کھَوہ کے مار مُکانا سوکھا نہیں
اَکھاں دے وچ اتھر بن کے رہنے آں
ساڈے پتر جھاڑ کے خُش پئے ہوندے او
اسیں تے رُکھاں اندر بن کے رہنے آں
کجھ رِچھاں نے جد دے جنگل چھڈے نیں
اسیں وی شاؔد قلندر بن کے رہنے آں