شاہ حسین دا کلام،ترجما تے مفہوم

شاہ حسین دا کلام
راگ گوڑی
چرخا میرا رنگڑا رنگ لال
جے وَڈ چرخا تے وَڈ مُنّے
ہُن کہہ گیا بارھاں پُنّے
سائیں کارن لوئن رُنّے
روئے ونجایا حال
جے وَڈ چرخا تے وَڈ گھمائن
سبھے آئیاں سِیس گندائن
کائی نہ آیا حال ونڈائن
ہُن کائی نہ چلدی نال
وَچھے کھادا گوہڑا واڑا
سبھو لڑدا ویہڑا پاڑا
میں کیہ پھیڑیا ویہڑے دا نی
سبھ پئیاں میرے خیال
جے وَڈ چرخا تے وَڈ پچھی
ماپیاں میرے سر تے رکھی
کہے حسین فقیر سائیں دا
ہر دَم نال سنبھال
ترجما:
میرا چرخا،رنگا رنگ،لال ای لال
چرخا وی وڈا تے ایہدے مُنّے وی وڈے ای ہوون گے۔
(مُنّا چرخے دے اگلے حصّے نوں کہندے نیں جہدے نال پاوا لگیا ہوندا اے۔)
اوہ تاں ایہ کہہ کے گیا کہ ہُنے آنا پر بارھاں ورھے لنگھ گئے
اوہدیاں اکھاں اپنے سائیں لئی رو رو لال ہو گئیاں
میرے چرخے دا وی رنگ لال ہو گیا اے
ایہ جے وڈا اے تاں ایس دا گھیر وی وڈا ہونا اے
میریاں سکھیاں وال بنوان لئی آئیاں نیں
پر میرا حال پُچھن لئی کوئی نہیں آئی اے
میرے سنگ تاں کوئی ٹُرن لئی وی تیار نہیں
میرا قصور کوئی نہیں پر فیر وی سبھ میرے نال لڑدے
میں اوہناں دا کیہ وگاڑیا اے بھلا
ایہ میرے مگر کیوں نیں
میرے چرخے دا رنگ لال
جے چرخا وڈا اے تاں ایس نال بنے سامان دی ٹوکری کہڑی نِکّی اے
اوہ ٹوکری ماپیاں میرے سر اُتے رکھی اے
حسین فقیر سائیں دا کہندا اے کہ ہر لمحے محبوب حقیقی نوں یاد کردی رہ
اَسان تے مختصر مطلب:
میرا چرخا مُراد میرا جسم بناوٹ دے لحاظ نال بُہت سوہنا رنگین اے۔جے ایہ وجود وڈا اے تے ایہدے فرض ادا کرن والے وی وڈے ای نیں،بالپن لنگھ گیا اے تے جوانی اے ۔اکھاں وچ محبوب لئی ہنجو بھرے نیں تے ایس نال بُرا حال اے۔انسان نوں جے اشرف المخلوقات کہہ کے وڈیایا گیا اے تے ایہدیاں ذمے واریاں وی بُہتیاں ہو گئیاں نیں۔سبھ انساناں نوں چنگے کم کرن لئی گھلیا گیا اے تے میں ہُن ایس جہان توں جاون والا آں میرے نال تے کوئی سنگ دی وی ہامی نہیں بھردا۔وچھے توں مُراد شیطان اے جس نے میرے سارے عمل گوا دِتے نیں ایہی کر کے گھر تے باہر دوواں پاسے دے لوک میرے نال لڑدے پئے نیں پر میں ایہناں دا کیہ وگاڑیا اے کہ ایہ میرے دُشمن بن گئے نیں۔اے انسان اپنے عشق حقیقی ول دِل لا تے اوہدا دَم ہر لمحے بھردا رہ کیوں جے ایہدے وچ ای تیری کامیابی اے۔