میں اِسلام دا پرچار پنجابی وچ کیتا، پنجاب دی ونڈ منظور نہیں،اپنی ماں بولی ، وسیب نوں کدے نہ بھلو،پنجابی لاگو کروان لئی سکولاں کالجاں وچ جا کے گل کراں گے:مولانا ناصر مدنی دا پنجاب کلچر دیہاڑ دے موقعے تے خطاب ـــــــ رویل نیوز

لاہور(نمائندا رویل )پنجابی پرچار تے ہورناں پنجابی تنظیماں ولوں پنجاب کلچر دیہاڑ مناون دا آہر کیتا گیا ایس رنگا ر نگی تقریب نوں کرونا وایرس پاروں لائی گئی روک پاروں اک ای تھاں تے محدود کرنا پیا جس کر کے پریس کلب توں فلیٹز ہوٹل تک دی ریلی تے فیر پنجاب سرکار ولوں الحمرا ہال وچ ہوون والی تقریب نوں ملتوی کر دتاگیا۔پریس کلب دے ساہمنے ہوون والے اکٹھ وچ پنجابی سوجھواناں،شاعراں ،ادیباں تے سیوکاں توں وکھ پنجابی لوکائی نے وڈی تعداد وچ شرکت کیتی ۔ایہدے وچ وکھ وکھ شہراں توں آئے فنکاراں نے اپنے فن دا وکھالا وی کیتا تے ڈھیر داد کھٹی۔ریلوے بینڈ نے اپنا فن وکھایا اصغر پہلوان تے کئی ہورناں فنکاراں نے وی لوکائی توں داد کھٹی۔ ایس دے نال نال پنجابی زبان نال پیار کرن پاروں اپنی اک وکھری نامنا کھٹن والے عالم دین مولانا ناصر مدنی ہوراں نے اُچیچے طور تے ایس پنجاب کلچر دیہاڑ وچ رلت کیتی ۔اوہناں نے اپنی گل بات کردیاں ماں بولی نوں اُچیچے طور تے اپناون دا درس دتا تے آکھیا کہ جہڑیاں قوماں اپنی زبان تے کلچر وسار دیندیاں نیں اوہناں دا ناں نشان وی نہیں رہندا۔اوہناں نے پنجاب ونڈن دی وی نندیا کیتی تے پنجاب دے سکولاں تے کالجاں وچ جا کے پنجابی زبان نوں ذریعا تعلیم بناون دی منگ نوں لوکائی تک اپڑاون دا وعدا وی کیتا۔اوہناں نے اپنے خطاب وچ وزیر اعلیٰ پنجاب نوں پنجابی لاگو کرن واسطےجتن کرن لئی کہیا تے عدالت ولوں مادری زبان نوں ذریعا تعلیم بناون دا وی چیتا کرایا۔آپ نے پر زور نعریاں نال پنجاب ونڈن والیاں نوں ونڈ نوں ڈکن دا سنیہا وی دتا۔