برتھ ڈے گفٹ

برتھ ڈے گفٹ
بولنا سکھ کے میں جو مونہوں
پہلا اکھر آکھیا سی
اوہنوں لبھدا پھرنا واں
اِس واری
تینوں تیری سالگرھا تے
میں اوہ اکھر دینا چاہناں
مینوں یاد اے،میں اوہ اکھر
تڑفدی ہوئی واء دے اُتے لکھیا سی
،مینوں تد ایہ آکھیا گیا سی
"واء نوں گِنیا جا سکدا اے"
فر کئی واری
میں کئی واری
چلد ی واء دی گنتی کیتی
واء نے مینوں گننا چاہیا
میرے ہر اِک لُوں وچ
سو سوبُلّے اُترے
حملا آور ہر بُلّا باوردی
،پر
میں کد گِنیا جا سکدا ساں
!ہندسیاں ورگیے
تیرے جیوندیاں رہن دا کارن مُک جاندا
جے میں گِنیا جاندا
جے میں مِنیا جاندا
میں کد گِنیا جا سکداساں
پہلا اکھر لبھن دے لئی
ہُن فیر واء نوں گِننا چاہناں
تُوں دھرتی دے اُتے آپنی
اِک دَکھ ہور وچھا دے
واء نے میرے لُوں لُوں وچوں
تے میں واء وچوں کِرنا واں
مونہوں نکلن والا پہلا
اکھر لبھدا پھرنا واں
تینوں تیری سالگرھا تے دیون لئی
٭ ٭ ٭ ٭ ٭