وزیر اعظم ولوں بارھاں سو اَرب دا ریلیف پیکج،صلاحواں تے مسئلے کیہ کیہ نیں٭ کیہ لوکائی نوں سُکھ دا ساہ آوے گا ایس بارے کابینا نے وڈا فیصلا کیتا------ رویل نیوز

اسلام آباد (نیوز ڈیسک) وفاقی کابینا نے کرونا وباء کارن لوکائی لئی 1200 ارب رُپئے دے ریلیف پیکج دی منظوری دے دِتی۔ وسیلیاں مطابق وزیراعظم عمران خان دی صدارت ہیٹھ وفاقی کابینا دا اجلاس ہویا‘ جہدے وچ 4 نکاتی ایجنڈ ے اُتے غور کیتا گیا‘ کابینا نُوں کرونا وایرس نال نبڑن لئی کیتے گئے اقدامات اُتے بریفنگ دِتی گئی۔ اجلاس دے دوران وفاقی وزیر مراد سعید نے کہیا کہ وزیراعظم دے ویلے سر تے درست اقدامات نُوں نمایاں انداز وچ پیش نہیں کیتا جاندا۔ کابینا نے 1200 ارب رُپئے دے ریلیف پیکج دی منظوری دے دِتی جد کہ کابینا کمیٹی برائے قانون سازی دے فیصلیاں دی وی توثیق کر دِتی۔ اجلاس دے دوران ایکسپورٹرز دا مال روکن دے معاملے اُتے وی بحث ہوئی‘ وفاقی وزیر فیصل واوڈا نے کہیا کہ وزیراعظم دیاں ہدایتاں دے باوجود حالے تک عملدرآمد نہیں ہویا‘ وزیراعظم نے ایکسپورٹرز دا مال روکن دیاں اطلاعواں دا نوٹس لیندیاں ہویاں ہدایت کیتی کہ گڈز ٹرانسپورٹ سنے ایکسپورٹرز دا مال نہیں روکیا جانا چاہیدا‘ اجلاس دے دوران کابینا ارکان نے کہیا کہ ٹرک اڈیاں اُتے ٹرانسپورٹرز دے ہوٹل بند نیں جہدی وجھا توں ڈرائیورز کجھ کھا پی نہیں سکدے‘ جہدے اُتے اجلاس دوران ٹرانسپورٹرز لئی مخصوص ڈھابا ہوٹلز کھولن دی تجویز اُتے وی غور کیتا گیا۔ وفاقی کابینا دے اجلاس بعد معاون خصوصی برائے اطلاعات نے میڈیا نُوں بریفنگ وچ دَسیا کہ ملک ایس ویلے ایمرجنسی دی صورتحال توں لنگھ رہیا اے۔ اسیں حق داراں تک اوہناں دا حق پہنچانا اے۔ کابینا نے 1200 ارب دے معاشی پیکج دی باضابطا منظوری دے دِتی اے۔ اوہناں نے دَسیا کہ کابینا اجلاس وچ چاراں صوبیاں وچ گڈز ٹرانسپورٹ کھولن دا فیصلا ہویا۔ سندھ وچ لاک ڈاؤن دی وجھا توں گڈز ٹرانسپورٹ نُوں مسئلیاں دا ساہمنا اے۔ وزیراعظم نے رینجرز نُوں سندھ وچ گڈز ٹرانسپورٹ دے مسئلیاں نُوں حل کرن دی خصوصی ہدایت کیتی۔ فردوس عاشق اعوان نے اپوزیشن لیڈر نُوں سخت تنقید دا نشانا بناندیاں ہویاں کہیا اے کہ اوہناں نے کرونا وایرس دی آڑ وچ گندا کھیڈ شروع کر دِتا اے۔ فردوس عاشق اعوان دا کہنا سی کہ قومی ایکے نُوں پارا پارا کرن والے لوکائی دوست نہیں ہو سکدے۔ اپوزیشن لیڈر اپنے آپ نُوں زندا رکھن لئی تنقید کردے نیں۔ اوہ اپنی کرونا زدا سوچ توں اجتناب کرن۔ اوہناں دا کہنا سی کہ لوکائی گندے سیاسی کھیڈ دی متحمل نہیں ہو سکدی۔ اپوزیشن لیڈر دا منفی رویا ساڈیاں کوششاں نُوں کمزور کر رہیا اے۔ شہباز شریف اپنے آپ نُوں قرنطینا کرن‘ مثبت تجویزاں دین تے عمل کراں گے‘ بغض‘ عناد تے ہٹ دھرمی دی عینک لاہ کے حقایق بیان کرن۔ اوہ پنجاب وچ دُدھ دیاں نہراں نہیں چھڈ کے گئے سن۔ اوہناں نے اپوزیشن لیڈر نُوں مشورا دِتا کہ اوہ کرونا ریلیف فنڈ وچ اپنے اثاثیاں توں کجھ رقم عطیا کر کے لوکائی دوس ہون دا ثبوت دین۔