پاک بھارت دوپاسی معاہدیاں دی خلاف ورزی کردی اے بھارتی سرکار٭دفتر خارجا ولوں کَرڑی نندیا------ رویل نیوز

اسلام آباد (نمائندا رویل) پاکستان نے مقبوضا جموں و کشمیر وچ ابادی دا تناسب تبدیل کرن دیاں غیر قانونی بھارتی کوششاں دی کرڑی نندیا کیتی اے تے بھارتی اقدام نُوں رَد کر دِتا اے۔ دفتر خارجا ولوں جاری بیان وچ ترجمان دفتر خارجا نے کہیا کہ پاکستان مقبوضا جموں و کشمیر وچ ابادی دا تناسب تبدیل کرن دیاں بھارتی حکومت دی تازا ترین غیر قانونی کوششاں دی کرڑی نندیا کردیاں ہویاں ا یہنوں رَد کردا اے۔ ”جموں و کشمیر تشکیل نو آرڈر 2020“ اِک ہور غیر قانونی بھارتی اقدام اے جہدا مقصد بھارت دے قبضے ہیٹھ جموں و کشمیر دے ڈومیسائل قوانین نُوں تبدیل کرنا اے۔ ایہ بین الاقوامی قانون تے چوتھے جینیوا کنونشن دی صریحن خلاف ورزی اے‘ تازا ترین بھارتی اقدام وی 5 اگست 2019 دے بھارت دے غیر قانونی تے اِک پاسی اقدامات دا ای تسلسل اے جہڑا اقوام متحدا دی سلامتی کونسل دیاں قرار داداں‘ پاکستان تے بھارت دے وچکار دو پاسی معاہدیاں تے انسانی قدراں دی کھلی خلاف ورزی اے۔ ترجمان دفتر خارجا نے کہیا کہ مقبوضا کشمیر وچ رہن والے کشمیریاں نے ایس نویں قانون نُوں ”ناقابل قبول“ متھدیاں ہویاں پوری طرحاںرَد کر دِتا اے۔ بلا شبا کشمیر ی ایہو جہے کسے وی ظلم نُوں قبول نہیں کرن گے جہڑا وہناں دے بنیادی حقاں نُوں غصب کرے یاں ابادی دے تناسب نُوں تبدیل کرے یاں اوہناں دی پچھان اوہناں توں کھوہ لوے۔بھارت دے تازا اقدامات اِک ایہو جہے موقع اُتے کیتے گئے نیں جدوں دنیا کرونا وایرس دی قومانتری وباء دے بحران نال لڑن وچ رُجھیا اے‘ ایس دوران بھارت دا ایہ انتہائی مذمت جوگ اے‘ بھارت صورتحال دا ناجایز فایدا چُکن دی بد نیتی وکھا رہیا اے جو بی جے پی دے نندن جوگ ”ہندتوا‘ ایجنڈے نُوں اگے ودھان دے خطرناک ارادیاں دا حصا اے۔