صنعت نوں ودھوتری واسطے وزیر اعظم ولوں وڈے پیکج دا اعلان ٭لوکاں نوں معاشی مصیبتاں وچوں کڈھیا جاوے گاـــــــــ رویل نیوز

اسلام آباد (نمائندا رویل) وزیراعظم عمران خان دا کہنا اے کہ کنسٹرکشن انڈسٹری لئی کل اِک وڈے پیکج دا اعلان کراں گا کہ ملک وچ صنعت دا فروغ حکومت دی ترجیح اے تے بزنس کمیونٹی دے بغیر پاکستان اگے نہیں ودھ سکدا۔ اسلام آباد وچ اِک تقریب نال خطاب کردیاں ہویاں وزیراعظم عمران خان دا کہنا سی کہ کرونا ویارس دی وجھا توں پوری دنیا مشک وچ اے‘ پاکستان وچ وباء دا کھلار دوجے ملکاں دی نسبت گھٹ ا ے تے اسیں کرونا وایرس دے حوالے توں ہر دن میٹنگ کردے آں‘ ساڈے اِک پاسے کرونا دوجے پاسے بھُکھ اے۔ وزیراعظم دا کہنا سی کہ اللہ دا خاص کرم اے جہو جہی صورتحال دوجے ملکاں وچ اے ساڈے ایتھے نہیں‘ شادی ہال‘ سکول دوجیاں عوامی تھاواں ہور دو ہفتے لئی بند کر دِتے نیں‘ لوکاں دے اجتماع نال وایرس کھلرن دا دھرُکو بُہتا اے پر اسیں موجودا وسایل نال کرونا اُتے قابو پا لواں گے۔ وزیراعظم عمران خان نے کہیا کہ کرونا دے اثرات نال کمزور طبقے نُوں سبھ توں ودھ خطرا اے‘ مزدوراں نُوں بیروزگاری توں بچان لئی بھرویں اقدامات کررہے آں‘ مزدور طبقے دی امداد لئی پیکج دا اعلان کیتا گیا اے‘ 1 کروڑ 20 لکھ بندیاں نُوں احساس پروگرام توں پیسے دواں گے۔ وزیراعظم دا کہنا سی کہ اسیں فیصلا کر لیا اے کنسٹرکشن انڈسٹری نُوں کھولنا اے‘ کنسٹرکشن انڈسٹری لئی کل اِک وڈے پیکج دا اعلان کراں گا‘ ملکوچ صنعت دا فروغ حکومت دی ترجیح اے‘ بزنس کمیونٹی دے بغیر پاکستان اگے نہیں ودھ سکدا۔دوجے پاسے وزیراعظم عمران خان دی صدارت ہیٹھ کرونا وایرس دی صورتحال دے حوالے توں قومی رابطا کمیٹی دا جایزا اجلاس ہویا جہدے وچ وزیراعظم نے کہیا کہ ساڈا مقابلا کرونا نال نہیں غربت تے بیروزگاری نال وی اے‘ ہر فیصلا زمینی حقایق ساہمنے رکھدیاں ہویاں کیتا جاوے گا‘ اجلاس وچ وفاقی وزراء حماد اظہر‘ خسرو بختیار‘ اسد عمر سنے ہوراں نے رلت کیتی۔ اجلاس وچ معاون خصوصی برائے صحت ڈاکٹر ظفر مرزا نے ملک وچ کرونا وایرس دی تازا صورتحال توں اگاہ کیتا‘ وزیر برائے منصوبا بندی اسد عمر نے کرونا وایرس دی صورتحال دے تناظر وچ معاشی تے انتظامی اقدامات خصوصن صوبا سندھ توں بلوچستان تے پنجاب نُوں کنک دی بلا تعطل ترسیل‘ صنعتی یونٹس دی روانی‘ سی پیک منصوبیاں اُتے عملدرآمد‘ وفاق تے صوبیاں دے وچکار رابطے دی بہتری تے کرونا دے حوالے توں تصدیق شدا ڈیٹا اکٹھا کرن دے حوالے توں لئے جان والے اقدامات تے اوہناں اُتے ٹورا کاری دے بارے وچ تفصیلی بریفنگ دِتی۔ اجلاس وچ فیصلا کیتا گیا کہ کثیر الضابطا ریسرچ کمیٹی قایم کیتی جاوے گی‘ کمیٹی مختلف شعبیاں بارے سفارشاں مرتب کرے گی تے ایہ سفارشاں قومی رابطا کمیٹی دے ساہمنے پیش کرے گی تاں جے ایہناں سفارشاں دی روشنی وچ کمیٹی مستقبل دے لائحے عمل دا تعین کر سکے۔ اجلاس وچ حکومت نے سی پیک منصوبیاں اُتے کم کھولن دا فیصلا کیتا تے وفاقی دارلحکومت وچ کم کرن والے ڈاکٹرز تے طبی عملے لئی 1 مہینے دی وادھو تنخاہ دی منظوری دِتی گئی تے کہیا گیا کہ ڈاکٹراں تے طبی عملے دا جذبا تے خدمتاں تحسین جوگ نیں۔ وزیراعظم عمران خان دا کہنا سی کہ انسداد کرونا لئی ہور ملکاں دے اقدامات دا جایزا لیا جا رہیا اے‘ پاکستان وچ حالات دنیا توں مختلف نیں‘ ساڈا مقابلا کرونا نال نہیں غربت تے بیروزگاری نال وی اے‘ ہر فیصلا زمینی حقایق ساہمنے رکھدیاں ہویاں کیتا جاوے گا‘ موجودا صورتحال وچ درست تے حقایق اُتے مبنی ڈیٹا دی دستیابی انتہائی اہمیت دی حامل اے‘ درست ڈیٹا دی فراہمی دے حوالے توں کسے قسم دی کوئی غفلت برداشت نہیں کیتی جاوے گی۔