kraamaat@gmail.com
+ +92 333-430-6384


سرکار نوں چاہیدا اے کہ کرونا اُتے دھیان دین٭سیاسی الزام تراشی ویلے دی لوڑ نہیں٭دیس اوکڑاں وچ اے٭ صحافیاں نال نا انصافی قبول نہیں : چئیر مین پیپلز پارٹی ـــــــ رویل نیوز


نمائندا رویل April 03, 2020


کراچی (نمائندا رویل) چیئرمین پیپلز پارٹی بلاول بھٹو زرداری نے کہیا اے کہ سوشل میڈیا اُتے ٹرینڈز راہیں گالھاں کڈھ کے صحافیاں نُوں سنیہا دِتا جا رہیا اے کہ یاں تے اوہ چُپ رہن یاں سزا سہن لئی تیار رہن‘ ایہو جہے ٹرینڈز حکومت دے ناقدین نُوں چُپ کروان دا حربا اے۔ بلاول بھٹو زرداری نے میڈیا نُوں جاری بیان وچ کہیا کہ حکومت تے تحریک انصاف مخالف اوازاں دی ٹرولنگ دی بجائے کرونا اُتے توجا دین اینی محنت کرونا اُتے بیداری لئی کیتی جاوے تے ویلے تے وسایل دا درست استعمال ہووے گا۔ بلاول بھٹو نے ہور کہیا کہ ایہناں غیر معمولی حالات وچ ملک نُوں ایکے دی ضرورت اے‘ کرونا وایرس دے بدترین چیلنج نال نبڑن لئی سانوں اک مُٹھ ہوون دی ضرورت اے اسیں ایس نازک موڑ اُتے اختلافات دی سیاست تے سیاسی الزام تراشی دے متحمل نہیں ہو سکدے۔ چیئرمین پی پی پی دا کہنا سی کہ انسانی تواریخ دے ایس بدترین بحران وچ میڈیا نے پوری دنیا وچ حکومتاں نُوں اوہناں دے اقدامات اُتے جواب دین والاٹھہرایا اے جہڑے سمجھدے نیں کہ دھونس نال میڈیا نُوں نَپیا جا سکدا اے اوہناں نُوں تاریخ یاد رکھنی چاہیدی اے پاکستان دے صحافیاں دی نا انصافی تے ظلم دے خلاف جدوجہد دی اِک لمی تاریخ اے‘ چیئرمین پیپلز پارٹی بلاول بھٹو زرداری نے ہور کہیا کہ ایہناں غیر معمولی حالات وچ ملک نُوں ایکے دی ضرورت اے‘ ایس نازک موڑ اُتے اختلاف دی سیاست تے سیاسی الزام تراشی دے سہن نہیں ہو سکدے۔