تعمیراتی سیکٹر نوں صنعت دا درجا٭گڈز ٹرانسپورٹ نوں چالو رکھیا جاوے٭کرونا دے بچاؤ واسطے  فنڈ جاری٭40 لکھ بندیاں نوں چیک ملنا جاری ہو جاون گے:نیشنل کوآرڈی نیشن کمیٹی دے اجلاس وچ وڈے فیصلے  ــــــــــــرویل نیوز

اسلام آباد (بیورو رپورٹ) وزیراعظم عمران خان نے تعمیراتی سیکٹر نُوں صنعت دا درجا دین تے کنسٹرکشن انڈسٹری ڈیولپمنٹ بورڈ دے قیام دا اعلان کر دِتا۔ نیشنل کوآرڈی نیشن کمیٹی دے اجلاس دے بعد صحافیاں نُوں بریفنگ دیندیاں ہویاں وزیراعظم نے کہیا کہ تعمیراتی شعبے وچ فکسڈ ٹیکس دا نظام لیا رہے آں‘ چالو سال سرمایا لان والیاں نُوں آمدن دا وسیلا دَسن توں استثنا‘ گھر ویچن والیاں اُتے کیپٹل گین ٹیکس نہیں لگے گا‘ کنسٹرکشن نُوں صنعت دا درجا دے رہے آں‘ صوبیاں نال رَل کے سیلز ٹیکس وچ کمی لیا رہے آں‘ جہڑے خاندان گھر ویچنا چاہندے نیں‘ اوہدے اُتے سیلز ٹیکس نہیں لگے گا‘ نواں پاکستان ہاؤسنگ سکیم لئی 30 ارب دی سبسڈی دے رہے آں‘ تعمیراتی سیکٹر 14 اپریل توں کھلے گا‘ گڈز ٹرانسپورٹ نُوں وی کھلا رکھیا گیا اے‘ کرونا ریلیف فنڈ لئی 10 ملین لوک ایس ایم ایس کر چکے نیں‘ 40 لکھ بندیاں نُوں کجھ دن وچ چیک ملنا شروع ہو جان گے‘ اسیں ایہ فنڈ ودھان دی کوشش کراں گے‘ کرائے دے گھراں وچ رہن والیاں لئی وی پالیسی لیا رہے آں‘ خوراک دی تھوڑ نہیں ہون دِتی جاوے گی‘ ذخیرا اندوزاں تے سمگلراں نُوں عبرت دا نشان بنایا جاوے گا۔ وفاقی دارلحکومت وچ صحافیاں نُوں پیکج توں اگاہ کردیاں ہویاں وزیراعظم نے ہور کہیا کہ پاکستان وچ اِک پاسے کرونا اے تے دوجے پاسے بھُکھ اے تے سانوں خوف اے کہ ایتھے لوک بھُکھ نال مرن گے‘ ایہو صورتحال ہندستان وچ تے ہور ملکاں نُوں وی ایہو خطرا اے۔ اوہناں نے کہیا کہ پاکستان وچ لاک ڈاؤن دی گل کریے تے ایہ نہ سوچو کہ ڈیفنس یاں گلبرگ یاں امیر علاقے وچ لاک ڈاؤن ہووے گا پر لاک ڈاؤن کامیاب اوہدوں ہووے گا جدوں غریب علاقے وی لاک ڈاؤن وچ ہون۔ اوہناں دا کہنا سی کہ وایرس جدوں کھلرنا شروع ہوندا اے تے فیر امیر تے غریب وچ تمیز نہیں کردا۔ وزیراعظم نے کہیا کہ ضروری اے کہ بحیثیت قوم ردِ عمل آئے ایس لئی قوم فیصلا کرے کہ ایہدا جواب کویں دینا اے ایس لئی اسیں سوچیا کہ جدوں غریب علاقے وچ لاک ڈاؤن کراں گے تے اوتھے لوکاں نُوں کھانا پہنچا سکاں گے۔ اوہناں نے کہیا کہ چین دے شہر ووہان وچ لوکاں نُوں گھراں وچ کھانا پہنچایا گیا تے چین وچ کامیابی دا راز ایہو سی کہ لوکاں نُوں گھراں وچ ای کھانا پہنچاییا گیا۔ اوہناں دا کہنا سی کہ کجھ دناں توں ویکھ رہیا آں کہ جدوں غریب محلے وچ کھانا دین جاندے آں لوک حملا کر دیندے نیں اسیں 1200 ارب دا پیکج دِتا اے تے 150 ارب رُپئے جاری کر دِتا اے۔ کرونا وایرس دے حوالے توں پیکج اُتے گل کردیاں ہویاں اوہناں دا کہنا سی کہ جہڑا شہری مددچاہندے نیں ایہدے لئی 1 کروڑ بندیاں دیاں درخاستاں آئیاں نیں‘ ایہدے باوجود سانوں کوئی گارنٹی نہیں اے 2 یاں 4 ہفتے بعد پاکستان وچ کیہ صورتحال ہووے گی۔ وزیراعظم نے کہیا کہ ایہ فیصلا ایس لئی کیتا اے کہ اِک پاسے ساڈا زراعت دا شعبا تے پنڈاں وچ ایس شعبے نُوں کھولیا اے کیوں جے اسیں نہیں چاہندے آں کوئی رکاوٹ آئے تے ہُن واڈھی دا موسم اے۔ اوہناں دا کہنا سی کہ پنڈاں دے اندر روزگار دا شعبا زراعت جہنوں اسیں مکمل طور اُتے کھولیاہویا اے‘ ایہدے نال نال ہسپتال دی سپلائی‘ کھانے تے ریستوران دا شعبا وی کھلیا ہویا اے ایسے طرحاں ٹرانسپورٹ دے شعبے نُوں وی کھولیا ہویا اے جہڑیاں شیواں نُوں پہنچانا چاہندے نیں۔ اوہناں نے کہیا کہ سکول‘ شادیاں تے جتھے وی لوک جمع ہو سکدے نیں اوتھے لاک ڈاؤن اے‘ کوئی نہیں کَہ سکدا کہ وایرس کنی تیزی نال کھلر سکدا اے تے 14 اپریل نُوں جایزا لواں گے۔ وزیراعظم نے کہیا کہ ایہ سمجھنا کہ پاکستان وچ کوئی خطرا نہیں ایس لئی مَوتاں گھٹ ہوئیاں نیں تے ایہ سوچ ای خطرناک اے‘ بلکل خطرا اے تے لوکائی نُوں کہندا آں کہ پوری توجا دین تے ہر قسم دی احتیاط کرن‘ عمران خان نے کہیا کہ زراعت دے بعد تعمیراتی شعبا ایہو جہیا شعبا اے جہدے وچ لوکاں نُوں روزگار دِتا جا سکدا اے۔ اوہناں نے کہیا کہ تعمیرات ایہو جہی صنعت اے جہدے نال معیشت دا پہیا چلنا شروع ہووے گا پر ساڈی حکومت دی خاہش اے کہ ساڈے دیہاڑی دار نُوں روزگار ملے کیوں جے سانوں نہیں پتا کہ دو ہفتے بعد کیہ ہووے گا۔ دوجے پاسے وزیراعظم عمران خان نے چیف آف آرمی چیف جنرل قمر جاوید باجوا دے نال نیشنل کمانڈ اینڈ اپریشن سینٹر دا دورا کیتا۔ ایس موقع اُتے وزیراعظم نُوں کرونا وایرس نال نبڑن لئی کیتیاں جان والیاں کوششاں تے مستقبل دے اقدامات توں اگاہ کیتا۔ وزیراعظم دا کہنا سی کہ 14 اپریل دے بعد صورتحال دا جایزا لے کے اگے دے فیصلے کراں گے پر اوہدوں تک موجودا پابندیاں جاری رکھیاں جان گیاں۔ الحمداللہ پاکستان وچ کرونا وایرس دی صورتحال پریشان کن نہیں۔ حکومتی اقدامات تے سارے اداریاں دی محنت نال صورتحال کنٹرول وچ اے۔ اوہناں دا کہنا سی کہ وباء بارے کوئی وی معلومات لُکانا قومی سلامتی نُوں خطرے وچ پان وانگوں ہووے گا۔ کرونا وایرس بارے آنکڑے کسے صورت نہ لُکائے جان۔ صوبیاں نُوں ساری معلومات مسلسل نیشنل کمانڈ اینڈ اپریشن سینٹر توں فراہم کیتی جاوے گی تے کرونا وایرس نال متاثرا لوکاں دی گنتی صرف نیشنل کمانڈ اینڈ اپریشن سینٹر جاری کرے گا۔