kraamaat@gmail.com
+ +92 333-430-6384


اِک  دیہاڑ اندر دیس وچ کرونا دے 66 نویں روگی ٭35 بندے جیون دی بازی ہار گئے٭ پوری دُنیا وچ دس لکھ بندے روگی ہو چُکے٭ہر لمحے تعداد ودھن لگی،خوف دی لہر برقرار ــــــــ رویل نیوز


نمائندا رویل April 04, 2020


)نیٹ نیوز) عالمی وباء کرونا نال پوری دنیا وچ 10 لکھ توں ودھ بندے بیمار ہو گئے جد کہ مرن والیاں دی گنتی 53 ہزار توں ودھ گئی‘پاکستان وچ وی کرونا دے وار جاری نیں‘ ملک وچ 24 گھنٹیاں دے دوران کرونا وایرس دے ہور 66 کیسز ساہمنے آ گئے نیں جہدے نال متاثرا روگیاں دی گنتی 2458جد کہ ایہدے نال واصل ہون والیاں دی گنتی35 ہو چکی اے‘ پنجاب کرونا وایرس دے روگیاں دی گنتی وچ سارے صوبیاں توں اگے اے جتھے ایس وایرس نال متاثرا بندیاں دی گنتی 928 تک پہنچ چکی اے دوجا نمبر سندھ دا اے جتھے روگیاں دی گنتی783 ہو چکی اے‘ خیبر پختونخوا وچ 311 کیسز‘ گلگت بلتستان وچ 190‘ بلوچستان وچ 169‘ اسلام آباد وچ 68 جد کہ ازاد جموں و کشمیر وچ 9 کیسز ہُن تک ساہمنے آ چکے نیں۔ پاکستان وچ 126 کرونا وایرس دے روگی ہُن تک صحت یاب ہو چکے نیں جد کہ 10 بندیاں دی حالت چنتا جنک اے۔ دوجے پاسے فرانس وچ پچھلے دن کرونا وایرس نال ہور 1335 تے سپین وچ 961 مَوتاں دا اعلان کیتا گیا جہدے بعد پوری دنیا وچ 24 گھنٹیاں وچ ہلاکتاں دی گنتی5500 ہو گئی۔ عالمگیر وباء دی زَد وچ آن والے روگیاں دی گنتی 10 لکھ تے مَوتاں دی گنتی 53 ہزار توں ودھ ہو چکی اے۔امریکا وچ ہور 25 ہزار کیساں دی تصدیق ہوئی تے 700 توں ودھ بندے ہلاک ہو گئے‘ امریکا وچ کیسز دی مجموعی گنتی 2 لکھ 40 ہزار تے ہلاکتاں دی گنتی 5800 توں ودھ اے۔ اٹلی وچ پچھلے دن ہور 760 مَوتاں ہوئیاں‘ اٹلی وچ کل ہلاکتاں 13915 تے سپین وچ 10348 ہو گئیاں نیں۔برطانیا وچ پچھلے 24 گھنٹیاں دوران 569‘ بیلجیم وچ 183‘ جرمنی وچ 176‘ نیدر لینڈز وچ 166 تے ایران وچ 124 بندے جان توں ہتھ دھو بیٹھے۔ فرانس وچ ہلاکتاں دی گنتی5387‘ ایران وچ 3160‘ برطانیا وچ 2921‘ نیدر لینڈ وچ 1339‘ جرمنی وچ 1107تے بیلجیم وچ 1011 تک پہنچ گئی اے۔