حکومت بجلی تے گیس دے بِل معاف کرے: امیر جماعت اسلامی ----- رویل نیوز

پشاور(نمائندا رویل) امیر جماعت اسلامی سراج الحق نے مطالبا کیتا اے کہ حکومت فوری طور اُتے بجلی تے گیس دے بِلاں دی معافی دا اعلان کرے۔ اپنے بیان وچ اوہناں نے کہیا کہ یوٹیلیٹی سٹوراں اُتے آٹے تے کھنڈ سنے لوڑی دیاں شیواں دی دستیابی نُوں یقینی بنائے۔ اوہناں نے کہیا کہ حکومت روزانا امدادی پیکج دے اعلانات کردی اے پر حالے تک کسے نُوں اِک رُپیا نہیں مِلیا۔ دیہاڑی دار مزدوراں دے گھرا ں وچ فاقیاں دی نوبت آ گئی اے۔ اوہناں دا کہنا سی کہ کرونا کیسز وچ وادھا ہو رہیا اے‘ حکومت بچاء لئی ذمے داری دا مظاہرا کرے۔ سراج الحق نے کہیا کہ کرونا دے خلاف فرنٹ لائن اُتے لڑن والے ڈاکٹرز تے عملے دی حفاظت نُوں یقینی بنایا جاوے۔ اوہناں دا کہنا سی کہ ڈاکٹرز دے مشورے نال اِ ک نواں کوڈ آف کنڈکٹ بنان دی ضرورت اے‘ ڈاکٹرز تے عملے نُوں معیاری حفاظتی کِٹ دِتے جان۔ اوہناں نے کہیا کہ حکومت ٹائیگر ز لئی خطیر رقم خرچ کر کے 4 لکھ شرٹاں بنوا رہی اے‘ ایہو رقم ڈاکٹرز تے پیرا میڈیکل سٹاف دی حفاظت لئی خرچ کیتی جا سکدی سی۔