آٹا تے کھنڈ  بحران دی رپورٹ اُتے ن لیگ خُش نہ ہووے٭خُد جانچ سیہان دا مُڈھ بنھیا گیا اے:فردوس عاشق اعوان

سیالکوٹ (این ایل آئی) وزیراعظم دی معاون خصوصی فردوس عاشق اعوان نے کہیا اے کہ آٹا‘ کھنڈ بحران دی رپورٹ وچ حکومتی شخصیات دی نشاندہی پی ٹی آئی وچ خُد جانچ دا اغاز اے‘ ماضی وچ رپورٹاں ساہمنے نہیں آندیاں سن‘ شہباز شریف آٹا‘ کھنڈ بحران دی رپورٹ اُتے بغلاں نہ وجان‘ رپورٹ وچ سلمان شہباز نُوں 1 ارب 40 کروڑ رُپئے سبسڈی دین دا ذکر وی اے۔ ویکھدے آں شہباز شریف سزا دین لئی کدوں اپنے پُتر نُوں بلاندے نیں۔ اوہناں دا کہنا سی کہ عمران خان نے اپنی جماعت وچ خُد احتسابی دا اغاز کر دِتا اے تے رپورٹ ساہمنے لیا کے اپنا وعدا پورا کیتا۔ وزیراعظم نے وعدا کیتا سی قانون سبھ لئی برابر ہووے گا۔ معاون خصوصی نے کہیا کہ ساڈے دور وچ 3 ارب رُپئے دی سبسڈی دِتی گئی‘ ن لیگ دے دور وچ 22 ارب رُپئے دی سبسڈی دِتی گئی۔ رپورٹ وچ شریف گرُپ دی بدمعاشی بے نقاب ہو گئی اے۔ شریف خاندان نے 1 ارب 40 کروڑ رُپئے دی سبسڈی لئی۔فردوس عاشق اعوان نے کہیا کہ 30 سال اپنے آپ نُوں فایدا پہنچان دی پالیسی بنائی جاندی رہی‘ 5 فیصد بندیاں نے 95 فیصد دے حقاں نُوں یرغمال بنارکھیا سی۔ اوہناں نے کہیا کہ رپورٹ دے فرانزک آڈٹ لئی 25 اپریل دی ڈیڈ لاین دِتی گئی اے۔ ملک وچ جاری معاشی بحران بار ے اوہناں دا کہنا سی کہ پوری دنیا دی معیشت تباہ حالی دا شکار اے۔ کوئی وی حکومت ایہناں چیلنجز دا کلیا مقابلا نہیں کر سکدی۔ معاون خصوصی پبلک پرائیویٹ پارٹنر شپ بحران توں نکلن دا کلا حل اے۔ ایکسپورٹرز دی سہولت کاری نال آرڈر مکمل کرن دی معاونت کرنی اے۔ مزدوراں لئی ہیلتھ سیفٹی ایس او پیز دے رہے آں۔ اوہناں دا کہنا سی کہ صنعتی پہیا رواں رکھن لئی ممکن اقدامات کرن جا رہے آں۔ ذخیرا اندوازں تے منافع خوراں اُتے کڑی نظر رکھی جاوے۔