عمران /ترین  تڑیڑاں٭   کڑڑا امتحان شروع ہو گیا اے:وفاقی وزیر ریلوے شیخ رشید

راولپنڈی (نمائندا رویل) وفاقی وزیر ریلوے شیخ رشید نے کہیا اے کہ تحقیقاتی رپورٹ 25 اپریل دے بعد آندی تے چنگا ہوندا پر ہُن عمران خان تے حکومت دا امتحان شروع ہو چکیا اے‘ جہانگیر ترین تے عمران خان دے وچکار تعلقات بُہت گوڑھے سن‘ ہُن عمران خان دا امتحان اے کہ اوہ 25 اپریل دے بعد اوہناں نال کیہ سلوک کردے نیں‘ کپتان جدوں چاہوے فیلڈنگ بدل سکدا اے‘ حکومت وچ کوئی گرُپ بندی نہیں‘ کپتان نے صرف فیلڈنگ بدلی اے۔ راولپنڈی وچ میڈیا نال گلبات کردیاں ہویاں اوہناں نے کہیا کہ عمران خان جاندے نیں کہ کہنوں کتھوں تک لے کے جانا اے۔ وزیر ریلوے نے کہیا کہ وزیراعظم اپنے سینے نال فیصلے لا کے رکھدے نیں‘ عمران خان نُوں 2 سال ہو گئے تے ہُن اوہ معاملات سمجھدے نیں۔ اوہناں نے کہیا کہ ملک دی بدقسمتی اے بزنس مین سیاست وچ آئے جہدے بعد مافیا ز مضبوط ہوئے تے ملک نُوں نقصان پہنچیا۔ شیخ رشید نے دَسیا کہ سبسڈی دین وچ اسد عمر دا کوئی کردار نہیں پر جے رزاق داؤد دا کہیا جاوے تے ظاہر اے اوہ انڈسٹری منسٹر سن۔ شیخ رشید نے کہیا کہ جہانگیر ترین تے عمران خان دے تعلقات وچ جہڑی تریڑ پئی اے اوہ ختم وی ہو سکدی اے۔ وزیر ریلوے شیخ رشید احمد نے کھنڈ دے بحران دے حوالے توں ایف آئی اے دی تحقیقاتی رپورٹ اُتے تبصرا کردیاں ہویاں کہیا اے کہ ایہ رپورٹ لیک ہوئی تے چنگا ہویا۔ فیصلے وزیراعظم عمران خان نے کیتے ایہناں دے بارے وچ مینوں وی پتا نہیں سی۔ اوہناں نے کہیا کہ اینی مخلوق نُوں راشن ونڈنا سوکھا کم نہیں‘ احساس پروگرام وچ پہلے توں رجسٹر لوک شامل نیں‘ کرونا وایرس دنیا دی سیاست بدل سکدا اے‘ کرونا جنی سیاسی ہلچل پیدا کیتی‘ نائن الیون نے وی پیدا نہیں کیتی سی۔