امریکی ڈالر وچ ریکارڈ وادھا،دیس دے قرضیاں دی مالیت ودھ گئی۔۔۔۔۔۔۔رویل نیوز

کراچی (نیوز ڈیسک) امریکی ڈالر پاکستانی کرنسی دے مقابلے وچ 167.90 رُپئے دا ہو گیا جہدے نتیجے وچ بیرونی قرضیاں ں وچ 900 ارب دا وادھا ہو گیا۔ انٹر بینک مارکیٹ وچ ڈالر ہور 92 پیسے مہنگا ہو کے ملکی تاریخ دی اُچی ترین سطح 167 رُپئے 90 پیسے دا ہو گیا۔ امریکی کرنسی دی قدر وچ وادھے کارن بیرونی قرضیاں دے بھار وچ 900 ارب رُپئے توں بُہتا وادھا ہو گیا اے۔ یاد رہوے کہ کرونا وایرس کارن ملک وچ جاری لاک ڈاؤن دے دوران ڈالر ہُن تک 9 رُپئے 23 پیسے مہنگا ہو چکیا اے۔ دوجے پاسے سٹاک مارکیٹ وچ چالو ہفتے دے دوجے کاروباری دن دے دوران تیزی دی واپسی ہوئی اے‘ 100 انڈیکس وچ 652.40 پوائنٹس دی تیزی ریکارڈ کیتی گئی جد کہ 31 ہزار دی نفسیاتی حد اِک واری فیر بحال ہو گئی اے تے انڈیکس 31231.55 پوائنٹس دی سطح اُتے پہنچ گیا۔ پورے کاروباری دن وچ 2.13 فیصد دی ودھوتری ویکھی گئی جد کہ 14 کروڑ 26 لکھ 53 ہزار 136 شیئرز دا لین دین ہویا جہدے کارن حصص دی مالیت 114 ارب رُپئے ودھ گئی۔