کو رکمانڈر کانفرنس،کرونا نال حالات دی جانچ پڑتال٭  چیف جنرل قمر جاوید باجوا  دی اگوائی۔۔۔۔۔۔ رویل نیوز

راولپنڈی (نیوز ڈیسک) آرمی چیف جنرل قمر جاوید باجوا دی صدارت ہیٹھ کور کمانڈرز کانفرنس ہوئی جہدے وچ کرونا نال پیدا ہون والی صورتحال دا بھروا جایزا لیا گیا۔ اوہناں دا کہا سی کہ انشاء اللہ ایہناں حالات توں اِک قوم بن کے نکلاں گے۔ پاک فوج دے شعبا تعلقات عاما (آئی ایس پی آر) دے مطابق کور کمانڈرز اجلاس وچ سول انتظامیا دی مدد لئی فوج دی تعیناتی دے پلان دا وی جایزا لیا گیا۔ آرمی چیف جنرل قمر جاوید باجوا دی اگوائی وچ ہون والی کانفرنس وچ کور کمانڈرز نے ویڈیو لنک راہیں رلت کیتی۔ اجلاس وچ خطے تے قومی سیکیورٹی صورتحال اُتے وی غور کیتا گیا۔ کور کمانڈرز نے کرونا وایرس دے مشکل ماحول وچ کم کرن والے ڈاکٹرز‘ قانون نافذ کرن والے اداریاں تے پیرا میڈیکل سٹاف نُوں سلاہیاا۔ آئی ایس پی آر دے مطابق ایس موقع اُتے اجلاس نال خطاب وچ آرمی چیف جنرل قمر جاوید باجوا نے ہدایت کیتی کہ کماندرز گلگت بلتستان‘ ازاد کشمیر‘ اندرون سندھ تے بلوچستان دے دور دُراڈے علاقیاں تک پہنچن۔ ایہناں علاقیاں وچ اہم وسائل دی ترسیل نُوں یقینی بنایا جاوے۔ آرمی چیف جنرل قمر جاوید باجوا دا کہنا سی کہ بطور قوم پرعزم جواناں دے نال ایس چیلنج نال نبڑاں گے تے ایہناں مشکل حالات توں انشاء اللہ اِک قوم بن کے نکلاں گے۔ دوجے پاسے آرمی چیف جنرل قمر جاوید باجوا دی ہدایت اُتے بلوچستان دے میڈیکل سٹاف لئی کرونا دے حفاظتی لباس سنے ضروری سامان گھل دِتا گیا اے۔ ترجمان پاک فوج دا اپنی ٹویٹ وچ کہنا سی کہ کرونا خلاف جنگ وچ ڈاکٹرز تے پیرا میڈیکل سٹاف فرنٹ لائن سپاہی نیں۔ وایرس توں حفاظت دے پیش نظر بلوچستان دے میڈیکل سٹاف لئی ضروری سامان روانا کر دِتا گیا اے جہدی آرمی چیف جنرل قمر جاوید باجوا نے خصوصی ہدایت کیتی۔ پاک فوج دے ترجمان میجر جنرل بابر افتخار مطابق آرمی چیف دا کہنا سی کہ مشکل دی ایس گھڑی وچ سبھ نُوں صبر دا مظاہرا تے ثابت قدم رہنا پوے گا۔ ترقی یافتا ملکاں نُوں وی ایس وباء نال نبڑن وچ اوکڑاں درپیش نیں۔ حکومت پاکستان سارے وسایل استعمال وچ لیا رہی اے۔