kraamaat@gmail.com
+ +92 333-430-6384


 آٹا کھنڈ  بحران وچ  شامل ہر مجرم خلاف کارروائی ہوئے گی:وزیر اعظم ------ رویل نیوز


نمائندا رویل April 08, 2020


اسلام آباد (نمائندا رویل) وزیراعظم عمران خان نے کہیا اے کہ آٹا‘ کھنڈ بحران وچ جہڑا وی ملوث ہویا اوہدے خلاف قانون مطابق کارروائی ہووے گی۔ وزیراعظم عمران خان دی صدارت ہیٹھ وفاقی کابینا دا اجلاس ہویا جہدے وچ کرونا وایرس دی موجودا صورتحال اُتے بریفنگ دِتی گئی۔ کابینا نے کچھی کینال منصوبے دی تحقیقات ایف آئی اے توں لے کے نیب دے حوالے کرن دی منظوری دے دِتی۔ اجلاس وچ موجودا سیاسی صورتحال‘ ملکی معاملات‘ آٹا کھنڈ بحرارن دی انکوائری رپورٹ اُتے وی گلبات کیتی گئی۔ وزیراعظم عمران خان نے حالیا فیصلیاں اُتے کابینا اراکین نُوں اعتماد وچ لیندیاں ہویاں کہیا کہ لوکائی نال رپورٹاں پبلک کرن دا وعدا پورا کر دِتا‘ 25 اپریل نُوں کمیشن دی رپورٹ ساہمنے آن اُتے ہور ایکشن ہووے گا‘ جہڑا وی ملوث ہویا اوہدے خلاف قانون مطابق کارروائی ہووے گی۔ ٹائیگر فورس دے حوالے توں وزیراعظم نے کہیا کہ نوجوان مشکل ویلے وچ قومی جذبے دا بھرواں مظاہرا کر رہے نیں‘ نوجواناں نُوں صوبائی تے ضلعی سطح اُتے چھیتی متحرک کیتا جاوے۔وزیراعظم نے وفاقی تے پنجاب کابینا وچ ہور تبدیلیاں دا عندیا دے دِتا۔ اوہناں نے کہیا کہ کھنڈ بحران دے ذمے داراں دا تعین کمیشن کرے گا‘ کابینا ہووے یاں میری انتظامی ٹیم‘ بہتری لئی ہر قدم چُکیا جاوے گا۔وفاقی کابینا دے اجلاس بعد میڈیا بریفنگ وچ فردوس عاشق اعوان نے دَسیا کہ وزیراعظم عمران خان نے تحقیقات کمیشن دے ارکان نُوں دھمکیاں دین اُتے سخت برہمی دا اظہار کیتا۔ اوہناں نے کہیا کہ دھمکیاں شوگر مافیا نے دِتیاں‘ جہناں دے خلاف انکوائری کمیشن تحقیقات کر رہیا اے‘ جے دُبارا کمیشن دے ارکان نُوں دھمکان دی کوشش کیتی گئی تے سخت ایکشن لیا جاوے گا‘ وزیراعظم 25 اپریل نُوں کمیشن دی حتمی رپورٹ دی روشنی وچ آئین تے قانون مطابق ایکشن لین لئی پُرعزم نیں۔ اوہناں دا کہنا سی کہ وزیراعظم نے واضح کیتا کہ انصاف دی راہ وچ کسے نُوں حایل نہیں ہون دِتا جاوے گا‘ مستقبل وچ مصنوعی بحران توں بچن لئی اصلاحات لیاندیاں جان گیاں۔ اوہناں نے دَسیا کہ وفاقی کابینا نے ممنوعا تے غیر ممنوعا اسلحا لائسنس دے اجراء‘ کچھی کینال منصوبے دی تحقیقات نیب دے حوالے کرن دی منظوری دے دِتی اے۔ اوہناں نے کہیا کہ بریفنگ وچ دَسیا گیا کہ ملک وچ روزانا 10 فیصد کرونا دے روگیاں وچ وادھا ہو رہیا اے۔ ایس توں وکھ وفاقی وزیر منصوبا بندی اسد عمر نے کہیا اے کہ اپریل دے آخر تک کرونا وایرس دے روزانا 25 ہزار ٹیسٹ کرن دی صلاحیت حاصل کر لئی جاوے گی‘ پہلے 700 توں 800 ٹیسٹ روزانا کیتے جا رہے سن تے ہُن ایہنوں 2ہزار یومیا کر لیا گیا اے‘ پچھلے دن 3 ہزار ٹیسٹ کیتے گئے‘ ہور ٹیسٹنگ مشیناں لائیاں جا رہیاں نیں۔ حکومت نے ہدف متعین کیتا اے کہ اپریل دے آخر تک روزانا 25 ہزار ٹیسٹ کرن دی صلاحیت حاصل کر لئی جاوے گی۔ اسد عمر دا کہنا سی کہ احساس پروگرام راہیں 1 کروڑ 20 لکھ خانداناں تک 12 ہزار رُپئے پہنچان دی تیاری کر لئی گئی اے تے 9 اپریل توں 40 لکھ خانداناں تک 16 ہزار 923 تقسیم دے پوائنٹس راہیں رقم دی فراہمی دا سلسلا شروع ہو جاوے گا۔