شیدے ٹلی دِیاں گھڑوساں

شیدے ٹلی دِیاں گھڑوساں

جمیل احمد پال

یقینن ہر بندا آدر جوگ ہوندا اے تے کسے دا ناں وگاڑنا وی کوئی چنگی گل نہیں۔ ایہدے نال نال ایہ وی حقیقت اے کہ عزت کیتی نہیں جاندی‘ کروائی جاندی اے۔ سیاستدان تے پبلک ڈیلنگ کرن والے لوکاں نوں پتا ہوندا اے کہ کوئی وی گل کرن لگیاں پہلاں تولنا چاہیدا اے تاں جے لوکاں دے دِل جِتے جا سکن۔ خاص کر سیاستدان جدوں کل نوں ہتھ وچ ٹھوٹھا پھڑ کے ووٹ منگے تاں لوک ووٹ دی خیر پاون‘ نہ کہ ”معاف کرو“ آکھ کے بوہا بند کر لین۔
اک ہور حقیقت ایہ وی اے کہ پنجاب دے لوکاں دا کھلا ڈُلا رویّا ہر قسم دے لوکاں نوں پریرنا دیندا اے کہ باہروں آ کے ایتھے وسن‘ ایتھے دا رزق کھاون‘ ایتھوں پیسے کماون تے فیر ایہدے بارے ای جو مرضی گند بکدے رہن۔ پنجابیاں نوں گالھ مندا بولن‘ ایہناں دا مذاق اُڈاون تے ایہناں دی زبان نوں مندا آکھن۔
ایس توں وکھ اک تیجی حقیقت ایہ وی اے کہ پنجابیاں نوں ہر پاسیوں اینیاں جُتیاں پے چُکیاں نیں کہ ایہناں نوں جاگ آونی شروع ہو گئی اے۔ ہُن ایہ ماں دھرتی تے ماں بولی بارے کسے وی بولن والے دے دند بھنن نوں اُتاولے نیں تے چھیتی ای پنجابی لہراوہناں حداں وچ جا اپڑے گی جتھے بولن والیاں نوں مونہ سنبھال کے گل کرنی پیا کرے گی۔
شیدا ٹلی‘ کوئی چنگا لفظ نہیں پر ایہ ناں اساں نہیں دِتا۔ عطا الحق قاسمی ہوراں مدتاں پہلاں اک ٹیلی ڈراما لکھیا سی جہدے وچ مرکزی کردار والے سیاستدان دا ناں ”شیدا ٹلی“ سی شیدے ٹلی وچ اوہ ساریاں ”خوبیاں“ موجود سن جو کسے منافق وچ یاں مطلبی سیاسی لیڈر وچ ہوندیاں نیں۔ پتا نہیں عطا الحق قاسمی ہوراں دی مراد کہدے توں سی پر بہت سارے ڈراما ویکھنہاراں نے اوس کردار دا اطلاق شیخ رشید ہوراں اُتے کر کے اوہناں نوں ایس خطاب توں سرفراز فرما دِتا تے اج جدوں اسیں شیدا ٹلی دا لفظ بولدے آں تاں ذہن وچ اِکو بندا آوندا اے۔
بانکے شاعر تے دھڑلے دار کالم نگار ظفر اقبال ہوراں اپنے اردو کالم وچ اِک واری ”دو طرفہ عجمی ذوق کے مالک راولپنڈی کے سیاستدان“ دے لفظ ورتے سن تاں کالم پڑھن والیاں نوں حیرانی نہیں سی ہوئی‘ کیوں جے اوہ راولپنڈی دے سیاستدان دی شہرت توں پہلاں ای واقف سن۔
انگریزی فلماں دا اک وڈا ایکٹر ہوندا سی‘ راک ہڈسن۔ ویاہ شیاہ اوہنے کوئی نہیں سی کیتا پر اوہدے بارے اکثر اجہے سکینڈل چھپدے ہوندے سن جہناں مطابق اوہنے فلانے جزیرے اُتے چھٹیاں گزاریاں تے فلانی ایکٹریس اوہدے نال رہی۔ فلانے موقعے اُتے فلانی رن اوہدے نال ویکھی گئی۔ گھٹیا امریکی اخبار روز دیہاڑے رناں اوہدے سکینڈل چھاپدے۔ ایہو راک ہڈسن بعدوں ایڈز دی بیماری نال مریا تے مرن توں پہلاں اوہنے اعتراف کیتا کہ اوہ جان بجھ کے ایکٹرساں نال سکینڈل بنواندا ہوندا سی‘ نہیں تاں اوہ اینے جوگا کتھے۔ بس اپنے ”دوطرفا عجمی ذوق“ توں لوکاں دی نگاہ ہٹانا مقصد سی۔
شیدے ٹلی دے وی مختلف ایکٹرساں نال سکینڈل تسیں اخباراں وچ پڑھدے ای ہووو گے……
ٹھیک اے‘ کسے وی بندے دا ذاتی کردار‘ اوہدی ذات تیکر ای محدود رہنا چاہیدا اے پر جدوں ایہو جہے گندے اندرون تے گندے بیرون والے بندے پنجاب دھرتی بارے مونہ دی بواسیر دا اظہار کرن تاں چُپ نہیں رہیا جاندا۔ وجھا ایہ کہ ایہناں دا ایہ کردار نرا اوہناں تیکر نہیں محدود ہوندا۔ ایہ کردار اوہناں دے محکمے‘ ریلوے اُتے وی اثر انداز ہوندا تہانوں نظر آ رہیا ہووے گا۔ جدوں دے اوہ ریلوے وزیر بنے نیں‘ ہر مہینے مگروں کدی انجن موندھا ہویا ہوندا اے‘ کدی کوئی بوگی پاسے بھرنے پئی ہوندی اے۔
اج اوہناں نے پنجاب نوں چار حِصیاں وچ ونڈن دی گل کیتی اے۔ ایس گل نوں نظر انداز وی کیتا جا سکدا اے کیوں جے ایہ کم کسے طرحاں وی ممکن نہیں‘ دُوجا ایہ کہ کاواں دے آکھے ڈھگے نہیں مردے ہوندے۔ پر مسئلا اوس ذہنیت دا اے جہدے وچ ہر کوئی اپنی سیانپ دا لُچ تلدا اے۔ ایہ لوک سندھ یاں کے پی کے دے معاملے وچ کدی گل نہیں کردے۔ پنجاب دی گل ہووے تاں پیو دی جاگیر وانگوں ایہدے ٹوٹے تے ونڈیاں بارے بے تکلفی نال ارشاد فرماندے نیں۔ سگوں پیو دی جاگیر وی کیوں‘ اوہدی ونڈ کدوں ایہناں نوں وارا کھاندی اے پر پنجاب بارے بولنا ضروری اے۔
شروع وچ اسیں دو تن حقیقتاں دی گل کیتی سی۔ ایہ لوک دُوجی حقیقت دے زمانے وچ رہ رہے نیں جدوں پنجاب بارے جو مونہ آیا‘ بول دتا جاندا سی۔ شیدے ٹلی سمیت سارے اجہے دُپاسی لوکاں نوں سمجھ لینا چاہیدا اے کہ ہُن تیجی حقیقت ساہمنے آ رہی اے۔ پنجابی ہُن مزید سنن دے مُوڈ وچ نہیں۔ بہتر اے ایہ لوک اپنی گندی چنجھ بند کر کے رکھیا کرن۔پنجابیاں دی انتہا پسندی دا ایہناں نوں نہیں پتا۔ پنجابی بہت کھل دِلا اے پر جدوں جُتیاں مارن اُتے آوندا اے تاں اودوں ای چھڈدا اے جدوں یاں تے جُتی ٹُٹ جاوے تے یاں فیر کھوپڑی۔

(شکریے نال روزوار لوکائی توں)
٭٭٭٭٭