قرضیاں بارے رپورٹ تیار،وڈی لُٹ مار ساہمنے آون والی اے۔۔۔۔۔۔رویل نیوز

اسلام آباد (نمائندا رویل)قرضیاں اُتے انکوایری کمیشن دی رپورٹ تیار ہو گئی اے جہڑی اگلے ہفتے وزیراعظم آفس وچ جمع کروائی جاوے گی جد کہ رپورٹ وچ ارباں رُپئے دی کرپشن دا انکشاف ہویا ایط۔ وسیلیاں مطابق قرضیاں اُتے انکوایری کمیشن دی رپورٹ 9 مہینیاں وچ تیار ہوئی‘ 2 درجن اداریاں نال وابستا 300 بندیاں نے 2008 توں 2018 دے وچکار لئے گئے ارباں رُپئے دے غیر ملکی قرضیاں دا غلط استعمال کیتا‘ رپورٹ وچ کئی ترقیاتی منصوبیاں وچ کک بیکس‘ اخیارات دے ناجایز استعمال‘ وڈے پیمانے اُتے خرد برد تے چوری دی نشاندہی وی کیتی گئی اے۔ انکوایری کمیشن نُوں انکوایری ایکٹ دے تحت حکومت دے حاصل کردا 420 غیر ملکی قرضیاں دا مکمل ریکارڈ مل گیا اے‘ کمیشن نے ایس گل دی وی نشاندہی کیتی کہ قرضیاں دی مد وچ پیسا کویں مشکوک انداز وچ سرکاری افسراں‘ پرائیویٹ کنٹریکٹرز‘ سیاستداناں تے پیپلز پارٹی تے مسلم لیگ (ن) دے ادوار حکومت وچ وزیراں دے نجی اکاؤنٹس وچ منتقل ہویا۔ انکوایری کمیشن نے 23 اد اریاں نال وابستا 200 اہم شخصیات دی نشاندہی کیتی اے جہناں نے 220 نجی اکاؤنٹس راہیں 150 منصوبیاں توں 450 ارب رُپئے دیاں خطیر منتقلیاں کیتیاں‘ کمیشن نے سرکاری قرضیاں تے واجبات وچ وادھیا دا وی جایزا لیا‘ جہڑا 2008 وچ 6690 ارب رُپئے توں ودھ کے ستمبر 2018 تک 30846 ارب ہو گئے۔ کمیشن نے 2008 توں 2018 تک 1020 منصوبیاں دی تفصیل حاصل کیتی‘ کمیشن ولوں منگلا ڈیم دی سطح بلند کرن دے علاوا رحیم یار خان‘ چشتیاں‘ وہاڑی‘ گجرات‘ شالیمار‘ کے وی ٹی لائن‘ دیامر بھاشا ڈیم‘ گومل زام ڈیم‘ پٹ فیدر کنال دا وادھا‘ شادی کور ڈیم دی اُساری تے ضلع گوادر دے 60 ترقیاتی منصوبیاں دی پُن چھان کیتی اے۔ انکوایری کمیشن نے پٹرولیم تے قدرتی وسایل دے 25‘ لواری ٹنل سنے مواصلات دے 85 منصوبیاں دی تفصیل حاصل کیتی اے‘ پورٹس اینڈ شپنگ تے ریلوے دے 56‘ ایچ ای سی دے 285‘ صحت بارے 78‘ آئی ٹی دے 203 تے ہور محکمیاں تے وزارتاں دے منصوبے شامل نیں‘ بی آر ٹی پشاور پروجیکٹ دی لاگت 30 ارب رُپئے توں ودھ کے 75 ارب رُپئے تے نیلم‘ جہلم ہائیڈرو پاور پروجیکٹ دی لاگت 84 ارب رُپئے توں ودھ کے 500 ارب رُپئے ہو گئی اے۔