لاک ڈاؤن مُکیا تاں ریل گڈیاں چلاواں گے، آٹا کھنڈ بحران دا فیصلا پنجھی اپریل دی رپورٹ نوں ہووے گا::وزیر ریلوے دی میڈیا نال گلبات۔۔۔۔۔۔رویل نیوز

اسلام آباد (نمائندا رویل)وزیر ریلوے شیخ رشید احمد نے کہیا اے کہ 25 اپریل تک کرونا تے آٹا کھنڈ بحرا ن اُتے حکومتی رپورٹ دا فیصلا ہو جاوے گا۔ اسلام آباد وچ میڈیا نال گل کردیاں ہویاں شیخ رشید احمد نے کہیا کہ 14 اپریل نُوں لاک ڈاؤن ختم ہون دے امکانات گھٹ نیں‘ لاک ڈاؤن ختم ہوندیاں ای 20 توں 22 ٹریناں فورن چلائیاں جان گیاں‘ محکما ریلوے نُوں ہر مہینے 1 ارب رُپئے دا نقصان ہو رہیا اے‘ کرونا وایرس توں بچاء لئی اقدامات کر رہے آں‘ ریلوے دے سارے سٹیشنز اُتے قرنطینا گیٹ بنائے نیں‘ کرونا وایرس ساہمنے آن اُتے مغلپورا ورکشاپ نُوں 12 اپریل تک بند کر دِتا اے‘ کیرج فیکٹری توں 50 سال توں ودھ عمر دے بندیاں نُوں چھٹی دے دِتی اے پر ریلوے ملازماں دیاں تنخاہواں اُتے کوئی فرق نہیں پوے گا۔ ریلوے دے قلی وی حکومت توں 12 ہزار رُپئے لے سکن گے۔ مال بردار گڈیاں باقاعدگی نال چل رہیاں نیں‘ فریٹ ٹرین اُتے لوکاں دے چڑھن دے واقعات دا نوٹس لے لیا اے‘ بغیر ٹکٹ سفر کرن والیاں دے خلاف کارروائی ہووے گی۔ شیخ رشید نے کہیا کہ جہانگیر ترین تحریک انصاف دی اہم شخصیت نیں‘ اوہناں دا چوناں تے پارٹی دے تنظیمی معاملات وچ وڈا عمل دخل اے‘ میرا خیال اے کہ عمران خان تے جہانگیر ترین دے وچکار فاصلے نہیں ودھن گے۔ تھوڑا جہیا گھاٹا وادھا ہویا اے‘ میرا نہیں خیال کہ کسے نُوں کڈھیا گیا اے۔ اوہناں نے کہیا کہ ایس ویلے میڈیا کرونا نُوں بھُل کے کھنڈ آٹے بحران دی رپورٹ اُتے لگ گیا اے‘ 25 اپریل تک کرونا تے حکومتی رپورٹ دا فیصلا ہو جاوے گا۔