تعلیم دی اہمیت

تعلیم دی اہمیت

تعلیم تے تربیت کسے وی انسان دی حیاتی دا اہم حصا تے لازمی انگ ہوندے نے کیوں جے ایہو کارن اے جو انسان تے جانور نوں وکھو وکھ کر دااے۔تعلیم بنا تربیت نامکمل اے تے تربیت بنا تعلیم۔ ایہ اک دوجے لئی لازم و ملزم نیں۔ کیوں صرف ڈگریاں دے سر اُتے اک اچھی زندگی نہیں گُزاری جا سکدی۔تربیت ایہدا اک لازمی حصہ اے۔ اک تعلیم تے تربیت یافتا قوم ہی ترقی دیاں منزلاں طے کردی اے۔ تعلیم ہر انسان دا بُنیادی حق ہوندا اے۔ فیر اوہ بھاویں مرد ہووے یا عورت ہووے۔سانوں ایہ تخصیص نہیں کرنی چاہیدی۔ساڈا اک وڈا المیہ اے کہ اسیں کُڑیاں دی تعلیم دے خلاف آں،جس دی وجھا توں اسیں اک چنگا معاشرہ تشکیل نہیں دے سکدے۔ جو اہمیت ساڈے معاشرے وچ مُنڈیاں نوں ملدی اے اوہو جے کُڑیاں نوں وی دتی جاووے تاں اسیں اِک مہذب قوم دے طور تے اُبھراں گے۔تعلیم دے ذریعے ای انسان حق تے باطل وچ فرق کر سکدا اے۔سچ تے جھوٹھ نوں اڈو اڈ کر سکدا اے۔ اچھائی تے بُرائی وچ تمیز کر سکدا اے۔
تعلیم دی اہمیت دا اندازہ اسیں ایس گل توں وی لا سکدے آں کہ جیہڑی پہلی آیت نازل ہوئی سی اوس دا ترجما کُجھ انج اے:
”پڑھو! اُس رب دے نام توں جہنے نے تہانوں پیدا کیتا۔“
ایس توں وکھ علم وچ اضافے دی دی سکھائی جس توں تعلیم دی اہمیت دا اندازہ ہو جاندا اے کہ تعلیم حاصل کرنا کس قدر ضروری اے۔
تعلیم و تر بیت دی لوڑ تے ہر دور وچ محسوس ہوندی رہی اے۔جویں جویں ادوار بدلے نیں اویں اویں ایہدی اہمیت ہور ودھدی جاندی اے۔جیویں ٹیکنالوجی دے حوالے نال ہر دور دیاں لوڑاں تھوڑاں روپ وٹاندیاں نظر آندیاں نیں اوسے طرح تعلیمی اعتبار نال وی کئی لوڑاں سانوں بدلدیاں جاپدیاں نیں۔ایسے طرح تعلیم ِ نسواں وی ہر دور دا اہم مسئلارہیا اے تے کسے نا کسے روپ وچ ساہمنے آ کھلوندا اے ایہکدے وی جڑوں نہیں مُک سکیا۔تے نا ای اسیں ایہنوں مُکان دی کوشش کرنے آں ایہ جد وی سامنے آندا اے اسیں نظراں چُرا کے اگانہ ودھن دی کوشش کرنے آں ایہدے وچ وی ساڈیاں الغرضیاں نیں۔
علم حاصل کرنا تے ہر مرد عورت تے فرض کیتا گیا اے۔ پر ایسں ایس گل دی اہمیت نوں سمجھنا نہیں چاہندے۔ایس نوں نظر انداز کرن نال نقصان ساڈا اپنا ای ہوندا اے۔ کیوں عورتاں تعلیم توں وانجھیاں ہون گیاں تاں جہالت نسلاں وچ سفر کرے گی، فیر بحیثیت قوم اسیں ترقی دیاں منزلاں کِداں طے کر سکاں گے۔ اک عورت نوں تعلیم دین دا مطلب اے اک خاندان نوں تعلیم دینا۔کیوں جے اک عورت دی گود وچ جنم لین والے اوہی کُجھ سکھن گے جو کُجھ اوہناں دی ماں اوہناں نوں سکھائے گی تے اوہناں نال ای ساڈا معاشرہ بندا اے۔ اسیں عورت نوں جنا تعلیم توں دور کراں گے اُتنا ای نقصان اُٹھاواں گے۔ کیوں جے عورت اک ماں اے اک بھین اک دھی اے اوہنے آون والیاں نسلاں نوں تربیت دینی اے تاں جے اک اچھا معاشرہ وجود وچ آ سکے۔ علم حاصل کرنا عورتاں مرداں دواں لئی ضروری اے۔
اک سیانیاں دی آکھی انگریزی وچ انج اے:
The hands that rock the craddle, rule the world
یعنی جہڑے ہتھ جُھولا جُھلاندے نے، حقیقت وچ اوہی ایس دُنیا اتے راج کردے نیں۔
قرآن پاک وچ ہر مرد تے سوانی نوں علم حاصل کرن لئی پریریا گیا اے۔ایہناں گلاں توں سوانیاں دی تعلیم تے تعلیم دی اہمیت دا اندازہ ہو جاندا اے کہ عورت نوں تعلیم دینا ات ضروری اے ایہ وقت دا تقاضا وی اے تے اوہدا حق وی اے کیوں جے تعلیم انسان نوں حیاتی گزارن دا ڈھنگ سکھاندی اے۔ تعلیم صرف کتاباں پڑھن دا ناں ای نہٰں اے۔ چنگی تعلیم لئی چنگے اُستاد دی لوڑ ہوندی اے۔ اک اُستاد، گُرو ہی انسان نوں صیحح راہ تے ٹور دا اے۔ چنگے شہری بناون لئی، چنگا معاشرہ بناون لئی اُستاداں دا کردار بہت اہمیت دا حامل اے۔ ایس سبھ لئی چنگے اُستاد دی ات لوڑ اے جو دس سکے کہ اصل تعلیم ہے کیہ اے۔ کیوں جے اک چنگا اُستاد نا صرف تعلیم دیندا اے سگوں تربیت وی کردا اے۔ زندگی گُزارن دے آدب توں متعارف کراندا اے اُستاد نوں روحانی ماں باپ دا درجہ دتا گیا اے۔ تے ایہ مقام ایویں تے نہیں دے دتا گیا ایس درجے نوں سمجھنا فیر ایس مطابق کم کر ضروری اے۔
اک مشہور اکھان اے:
با ادب با مُراد بے ادب بے مُراد
ایس قول راہیں وی سانوں تعلیم تے تربیت آپس وچ جُڑے نظر آندے نیں۔ کیوں جے اکلی تعلیم اوتھے تک نہیں اپڑ سکدی جتھے تائیں ادب اپڑدا ا۔ اُستاد نوں king maker کہیا جاندا اے۔
اُستاد بارے اک ہور آکھی انج اے:
A teacher takes a hand,opens a mind, and touches a heart.
اک بہترین اُستاد جس دا ہتھ پھڑدا اے اوس دے ذہن نوں وسعت بخش دا جیون دا ول دسدا اے سوچن دا ول دسدا اے تے دل وچ اُتر جاندا اے۔
اک چنگی قوم بنن لئی، ترقی دیاں منزلاں طے کرن لئی تے تہذیب یافتا معاشرا بناون لئی تعلیم و تربیت دا ہونا ات ضروری اے۔ ایس توں کسے نوں وی وانجھا نہیں ہونا چاہیدا۔ انسان نو ں رب نے اشرف المخلوقات بنایا اے۔ ایس دُنیا دے جھیڑیا ں توں نکل کے اپنے مقام نوں سمجھنا ضروری اے جس وچ جنس دی تخصیص توں بنا سچیا جاوے تے کم کیتا جاوے۔