اَدھا دِل

ادّھا دِل

سُن وے بیبا
سوچ وے بیبا
زہراں ورگی جیکر ہووے
کھنڈ نہیں چنگی ہوندی
اِکو گھر وچ آپو اپنی
گنڈھ نہیں چنگی ہوندی
بھاویں کِنی چنگی لگے
ونڈ نہیں چنگی ہوندی
ورھیاں پہلوں ساڈے اُتے
لال انھیری گھُلی
مُڈھوں کِنے رُکھ پٹیجے
پھُلاں دی رَت ڈُلھی
پہلے والی ونڈ وی سانوں
حالے تک نہیں بھُلی
ایس ونڈ نے دھرتی اُتے
لال لکیراں کھِچیاں
ایہو ای سی جہنے ساڈے
تن تَوں لیراں کھِچیاں
اکھاں توں نہ ویکھیاں گئیاں
اوہ تصویراں کھِچیاں
ایہو ای تے ونڈ سی جہنے
گُوڑھے یار نکھیڑے
ایسے نے ای دِلاں دے شیشے
وارو وار تریڑے
اونتر جانی دتے سانوں
عمراں بھر دے جھیڑے
ایسے ونڈ نے قسمے سانوں
تھاں تھاں خون روایا
ہیرے موتی لعلاں نوں اس
مِٹی وچ رَلایا
ایہ پنجاب تے دل سی ساڈا
ادّھا حِصّے آیا
سُن وے بیبا
سوچ وے بیبا
دُھپ تَوں بھَیڑی چھاں لینا ایں
کملا ایں ناں تاں لینا ایں
جھلیاں وانگوں ویل کویلے
جہڑی ونڈ دا ناں لینا ایں
اوسے ونڈ وچ بدّھا دل
ورھیاں تَوں ایہ ادّھا دل
دیندا پیا ای سدّا دل
مینوں ای ہر وار نہ ونڈو
ادّھا دل تے یار نہ ونڈو
مینوں ای ہر وار نہ ونڈو
٭٭٭٭٭