ڈاکٹراں،نرساں تے ہور ہیلتھ ورکراں لئی حفاظتی سامان دا آہر کیتا جائے گا٭  گھر بندی نال غربت ودھ رہی اے،ہسپتالاں اُتے دباء پین نال مسئلے ودھن گے:بلوچستان وچ وزیر اعظم دی گلبات۔۔۔۔۔رویل نیوز

کوئٹہ (نمائندا رویل) زیراعظم عمران خان نے کہیا اے کہ اپریل دے آخر وچ پورے ملک دے ہسپتالاں اُتے دباء ودھے گا پر سانوں ساریاں نُوں رَل کے کرونا وایرس دی سنگین صورتحال نال نبڑنا پوے گا‘ ساڈے ڈاکٹرز‘ نرسز‘ ہیلتھ ورکرز لئی خصوصی حفاظتی کپڑیاں اُتے پورا زور لایا ہویا اے جد کہ جہڑے لوک انتہائی نگہداشت وچ کم کرن گے اوہناں لئی حفاظتی کِٹاں پوریاں کر دِتیاں نیں‘ پر اللہ دا کرم اے کہ بلوچستان وچ حالے تک کوئی روگی آئی سی یو وچ نہیں گیا‘ مینوں دھرُکو اے کہ لاک ڈاؤن دی وجھا توں یومیا اجرت والے‘ چھوٹے دُکانداراں تے ہور ایہو جہے لوکاں اُتے بلوچستان وچ بُہتا اثر پوے گا کیوں جے پورے پاکستان وچ سبھ توں بُہتی غربت ایتھے اے۔ ایہناں خیالاں دا اظہار اوہناں نے گورنر ہاؤس وچ وزیر اعلا بلوچستان جام کمال تے گورنر بلوچستا جسٹس (ر) امان اللہ یاسین زئی دے نال پریس کانفرنس دوران خطاب کردیاں ہویاں کیتا۔ عمران خان نے کہیا اے کہ بلوچستان دے دیہاڑی دار مزدور نُوں لاک ڈاؤن توں بُہت نقصان ہویا اے سانوں لگ رہیا اے کہ چالو مہینے دے آخر تک ملک دے ہسپتالاں اُتے بہت دباء پوے گا‘ پر اسیں ساریاں نے رل کے ایس کرونا وایرس دی صورتحال نال نبڑنا اے کرونا وایرس دی وجھا توں اِک ایہو جہی صورتحال پیدا ہوئیا ے جہدی کوئی مثال نہیں‘ ایس لئی میرے آن دا مقصد ایہ اے کہ اسیں اِک قوم بن کے مقابلا کریے‘ سانوں ایس صورتحال دی وجھا توں 22 شیواں دی فکر اے‘ اِک ایہ کہ ایہد نال ساڈی صحت دیاں سہولتاں اُتے جہڑا دباء پے رہیا اے پر حالے اینا بُہتا دباء نہیں اے پر جو اسیں ویکھ رہے آں تے دنیا وچ جس طرحاں وادھا ہو رہیا اے اوہنوں ویکھدیاں ہویاں ساڈا اندازا اے کہ اپریل دے آخر تک ہسپتالاں اُتے بہت دباء ہووے گا پورا ملک ایہدے نال نبڑن دی تیاری کر رہیا اے‘ ساڈا اِک نیشنل کمانڈ اِک اپریشن سینٹر بنیا اے جہدے وچ روزانا سارے چیف سیکرٹریز تے صوبیاں دے نال رابطا ہوند اے‘ ایہدے علاوا ساڈے ماہرین صحت کرونا وایرس دے کیسز دا مکمل جایزا لے رہے نیں تے ایہ وی ویکھ رہے نیں کہ کنیاں مَوتاں ہوئیاں تے اوہناں دی کیہ عمر سی تے کنے لوک آئی سی یوز وچ نیں۔ وزریاعظم عمران خان نے کہیا اے کہ ساڈے لئی سبھ توں ضروری اے کہ اسیں ویکھیے کہ بھارت تے بنگلا دیش وچ کیسز کس طرحاں دے نیں کیوں جے اوہناں دی تے ساڈی آبادی رلدی ملدی اے تے ایہناں ساریاں شیواں دا وی جایزا لیا جا رہیا اے‘ ڈاکٹرز‘ نرسز‘ ہیلتھ ورکرز لئی خصوصی حفاظتی کپڑیاں اُتے پورا زور لایا ہویا اے۔اوہناں نے کہیا کہ پوری دنیا وچ وینٹی لیٹرز تے ذاتی تحفظ دیاں کِٹاں دی کمی اے تے طلب ودھن دی وجھا توں دنیا وچ ایہدے اُتے دباء ودھیا ہویا اے سانوں لگ رہیا اے کہ مہینے دے آخر تک ساڈے ہسپتالاں اُتے بڑا دباء پوے گا پر اوہناں نے کہیا کہ میرا خیال اے کہ بلوچستان وچ ایہ داء گھٹ ہووے گا پر ہور صوبیاں وچ بُہتا ہووے گا کیوں جے ایتھے صرف کوئٹہ وچ آبادی بُہتی اے تے گنجان آباد اے ورنا باقی بلوچستان کھلریا ہویا اے تے ابادی دور دور اے‘ پر ایہدی نسبت جے خدانخواستا ایہ بیماری کھلرنا شروع ہوئی تے ساڈے شہر کراچی‘ لاہور‘ اسلام آباد‘ فیصل آباد‘ راولپنڈی وغیرا وچ بہت زیادا دباء پوے گا۔ اوہناں نے کہیا کہ 14 اپریل نُوں سارے صوبیاں نُوں دَساں گے کہ اوہناں نے لاک ڈاؤن دوران کہناں کہناں شیواں وچ نرمی کرنی اے تے ایہ صوبیاں دا فیصلا ہووے گا کہ اوہ کہناں کہناں شیواں نُوں کھولنا چاہندے نیں کیوں جے لاک ڈاؤن دی وجھا توں غربت تیزی نال ودھ رہی اے۔ وزیراعظم عمران خان دا کہنا سی کہ ایس ویلے وفاقی حکومت تے صوبائی حکومت وچکار مکمل تعاون چل رہیا اے کیوں جے جہڑی صورتحال ایس ویلے اے اوہدے نال کوئی حکومت کلی نہیں لڑ سکدی سگوں اسیں سارے رَل کے ایہدا مقابلا کراں گے۔