کراچی:کرونا نے پوری دُنیا نوں ولھیٹ لیا اے٭ وایرس دی جانچ دا پربندھ کیتا جاوے:چینی  ماہرین۔۔۔۔۔رویل نیوز

کراچی (نیوز ڈیسک) چین دے شہر ووہان توں شروع ہون والے کرونا وایرس نے ایس ویلے پوری دنیا نُوں اپنی ولھیٹ وچ لیا ہویا اے جہدے بعد ہر لنگھدے دن نال ایہدی تباہی وچ وادھا ہوندا جا رہیا اے۔ ایسے دوران کراچی وچ صحافیاں نال گلبات کردیاں ہویاں چینی ماہرین نے کہیا اے کہ پاکستان وچ ہائی رسک پاپولیشن وچ کرونا وایرس دے کھلرن دی شرح خوفناک اے‘ حکومت پاکستان تے صوبائی حکومتاں نُوں مشورا دِتا اے کہ کرونا وایرس دی ٹیسٹنگ نُوں ودھایا جاوے تے جہڑے لوک ایس وایرس نال متاثر ہون اوہناں نُوں اوہناں دے گھراں‘ آئسولیشن سینٹرز تے ہسپتالاں وچ آئسولیٹ کر دِتا جاوے‘ پاکستان وچ ماسک پان دی شرح وی انتہائی گھٹ اے‘ کرونا وایرس توں بچاء وچ ہتھ دھون تے سینیٹائزرز دے استعمال نال نال ماسک پان دا کردار انتہائی اہم اے۔ چینی ماہرین صحت دے وفد دی قیادت سنکیانگ صوبے دے ڈپٹی ڈائریکٹر جنرل ہیلتھ ڈاکٹر مامنگھوئی کر رہے نیں تے ایہ وفد ایس ویلے پاکستان دے دورے اُتے اے‘ ایس دورے دا مقصد پاکستان وچ کرونا وایرس نُوں کنٹرول کرنا اے۔