کلّی سرکار ای مسئلے گھٹا نہیں سکدی:فردوس عاشق اعوان۔۔۔۔۔۔۔۔۔رویل نیوز

اسلام آباد (بیورو رپورٹ) معاون خصوصی اطلاعات فردوس عاشق اعوان نے کہیا اے کہ حکومت کلی ہر بندے دی مشکل نُوں گھٹ نہیں کر سکدی تے نہ ای کوئی ادارا انج کر سکدا اے‘ اوہناں دا کہنا سی کہ جے سارے مخیر حضرات سارے اپوزیشن اراکین نال رَل کے کم کرن تے اوکڑاں گھٹ ہو سکدیاں نیں۔ ایم ڈی یوٹیلٹی سٹورز دے نال اسلام آباد وچ پریس کانفرنس کردیاں ہویاں فردوس عاشق اعوان دا کہنا سی کہ جہڑے لوک مستحق بندیاں دی مدد کر رہے نیں اوہناں نُوں سلام پیش کردی آں۔فردوس عاشق اعوان نے کہیا کہ 10 ارب رُپئے یوٹیلٹی سٹوراں نُوں ادا کر دِتے گئے نیں۔ وزیراعظم عمران خان نے 19 شیواں سستے بھاء لوکائی تک پہنچان دا فیصلا کیتا اے۔ یوٹیلٹی سٹوراں نُوں لوکائی دی فلاح لئی فنگشنل کراں گے۔ ڈھائی ارب دیاں شیواں خرید کے لوکائی نُوں سستے بھاء ویچیاں جان گیاں۔ وزیراعظم عمران خان نے مستحقین نُوں کیش دین دی سکیم دا اغاز وی اج توں کر دِتا اے‘ 1 خاندان نُوں 12 ہزار رُپئے دِتے جان گے۔ 144 ارب رُپئے غریباں وچ ونڈے جا رہے نیں‘ ایہدے اُتے اوہناں غریباں دا حق اے جہڑے غربت دی لکیر توں وی تھلے نیں۔