پاکستان وچ وی کرونا وایرس دے روگیاں دے علاج لئی کلورو کوئن دی تیاری تے پلازما تھراپی دی اجازت۔۔۔۔رویل نیوز

لاہور (نمائندا رویل)پاکستان وچ کرونا وایرس دے علاج لئی کلورو کوئن دی تیاری تے پلازما تھراپی دی اجازت دے دِتی گئی اے۔ وزیرِ اعظم عمران خان دے معاونِ خصوصی برائے صحت ڈاکٹر ظفر مرزا دی ہدایت اُتے کرونا وایرس توں بچاء لئی ڈرگ ریگولیٹری اتھارٹی پاکستان (ڈریپ) ولوں ایہ اہم اقدامات کیتے گئے نیں۔ ڈاکٹر ظفر مرزا نے دَسیا اے کہ ڈریپ نے کلوروکوئن دے خام مال دی مقامی طور اُتے تیاری دی اجازت دے دِتی اے‘ ڈریپ نے کرونا دے علاج لئی پلازما تھراپی دے کلینیکل ٹرائلز دی وی اجازت دے دِتی اے۔ اوہناں نے دَسیا کہ ڈریپ نے پاکستان وچ تیار ہون والے وینٹیلیٹرز دے کلینکل ٹرائلز دی اجازت وی دے دِتی اے۔ وزیراعظم دے معاون خصوصی دا کہنا سی کہ پاکستان انجینئرنگ کونسل دے تیار کردا وینٹیلیٹرز نُوں استعمال توں پہلے ٹیسٹ کیتا جا رہیا اے۔ اوہناں نے ہور دَسیا کہ ڈریپ ولوں 50 توں ودھ کمپنیاں نُوں 3 مہینیاں لئی ہینڈ سینیٹائزر بنان دی اجازت دے دِتی گئی اے۔ ڈاکٹر ظفر مرزا نے ایہ وی دَسیا کہ ہینڈ سینیٹائزر دی فراہمی یقینی بنان لئی ڈریپ نے کجھ دن پہلے نوٹی فکیشن جاری کیتا سی‘ لائسنس یافتا کمپنیاں ڈبلیو ایچ او دیاں ہدایتاں دے مطابق معیاری ہینڈ سینیٹائزر تیار کرن گیاں۔