کرونا نال بنے حالات وچ نوکریاں بچان دی ذمے وار حکومت اے:اسلام آبادہائیکورٹ۔۔۔۔۔رویل نیوز

اسلام آباد (بیورو رپورٹ) ہائیکورٹ نے ریمارکس دِتے نیں کہ کرونا وایرس دے کارن پیدا ہون والی صورتحال وچ لوکاں دیاں نوکریاں بچانا حکومت دی ذمے داری اے۔ کرونا لاک ڈاؤن دی وجھا توں عام بندے دے نال نال انڈسٹری مالکان وی اوکڑاں دا شکار ہو گئے۔ مقامی سیمنٹ فیکٹری بجلی دے بل وچ ریلیف لین اسلام آباد ہائیکورٹ پہنچ گئی تے بجلی دا 7 کروڑ توں بُہتا بل قسطاں وچ جمع کروان دی درخاست کیتی۔ درخاست وچ موقف اختیار کیتا گیا کہ کرونا وایرس دے کارن سیمنٹ فیکٹری بند اے‘ عدالت بجلی دے بل دی 3 قسطاں وچ ادائیگی دا حکم دیوے۔ اسلام آباد ہائیکورٹ نے مقامی سیمنٹ فیکٹری نُوں 15 اپریل تک 33 فیصد بل دی ادائیگی دا حکم دیندیاں ہویاں اسلام آباد الیکٹرک سپلائی کمپنی (آئیسکو) نُوں باقی رقم وصول کرن توں روک دِتا۔ اسلام آباد ہائیکورٹ نے حکم امتناع جاری کردیاں ہویاں وزارت توانائی تے آئیسکو توں جواب منگ لیا۔ چیف جسٹس اطہر من اللہ نے ریمارکس دِتے کہ ایہ اوہ حالات نیں جہدے وچ حکومت نے ہر کسے دی حوصلا افزائی کرنی اے‘ حکومت نے بجلی دے بلاں دی ادائیگی دی تواریخ وچ وادھا کیتا اے‘ حکومت دی ذمے داری اے اوہ ایہناں حالات وچ ملازماں دیاں نوکریاں بچان لئی اپنا کردار ادا کرے‘ عدالت ایس ویلے ریاست نُوں مکمل سپورٹ کرے گی۔ جسٹس اطہر من اللہ نے ہور کہیا کہ حکومت ایہو جہے اقدامات لوے تاں جے کسے پرائیویٹ ادارے دا ملازم وی نوکری توں ہتھ نہ دھو بیٹھے۔ عدالت نے حکم امتناع جاری کردیاں ہویاں کیس دی سنوائی 17 اپریل تک ملتوی کر دِتی۔