"رانا محمد زبیر صابر دا لیکھ " دُنیا وِچ بنے کجھ وکھرے سکول

سِکھیا(تعلیم) انسان دابنیادی حق اے۔کوئی انسان غریب ہوئے یا امیرہوئے اوہ جس وی گھر وِچ رہندا ہووئے اوہنوں ایہ حق ہر حال وِچ ملنا چاہیدااے۔اقوام متحدہ دے چارٹر وِچ تعلیم نوں بنیادی انسانی حق کہیا گیا اے۔برصغیر دی گل کرئیے تے ایتھے اج وی بالاں دی اک وڈی گنتی سکول توں باہر ملدی اے۔پاکستان،بھارت،بنگلادیش وِچ آبادی بہت تیز ی نال ودھ رہی اے تے دولت دے فرق دی وجھاتوں بہت سارے بال سکول نہیں جاسکدے۔کجھ بال غربت دی وجھا توں کم کار کرن لگ پیندے نیں۔سرکاراں سکولاں دی بہتری لئی کوشش کر رہیاں نیں پر کجھ تھاواں تے سرکاری سکول وی کم نہیں دے سکدے۔ایہناں سارے مسئلیاں دے باوجود کجھ لوکاں نے دُنیا توں وکھ سکول کھولن د ا جتن کیتا تے اوہ ایس میدان وِچ کجھ کر کے دیکھا رہے نیں۔

سبھ توں پہلاں بنگلادیش دی گل کردے آں۔مون سون دے ایس خطے وِچ مینہ بہت پیندے نیں۔مینہ تے سیلاب دی وجھا توں بنگلادیش تے پُل، سڑکاں تباہ ہوجاندیاں نیں۔دریاواں دی زمین کہیا جان والا ایہ ملک ہر ویلے قدرتی آفت نال لڑدا اے۔بنگلادیش وِچ سکول دا اک ماڈل دِتا گیا جہدے وِچ سکول کشتی وِچ کھولے گئے نیں۔ہر اک کشتی اک کلاس دا منظر پیش کر دی اے۔بنگلال وِچ ندی،نالے، دریا بہت نیں ایس لئی ایہ سکول اک وڈی گنتی وِچ بنے تے ایہناں نے بنگال د ے لڑیسی ریٹ نوں وی ودھا یا اے۔ایس ماڈل نُوں دنیا وِچ اک کامیاب ماڈل مِتھیا گیا اے۔ہن ویکھن وِچ آیا کہ ایہناں کشتی سکولاں وِچ جدید کمپیوٹر لیب دے سائنس لیب وی بنا دِتیاں گئیاں نیں۔

بھارت وِچ اک سکول ریلوے پلیٹ فارم تے بنا یا گیا سی جس دے بعد کجھ ہور سکول وی ریلوے پلیٹ فارمز اُتے کھولے گئے نیں۔ایہناں سکولاں دے ماڈل نوں وی دُنیا وِچ بہت پسند کیتا گیااے۔

اپنے دیس پاکستان دی گل کرئیے تے ایتھے وی کجھ لوکاں نے بہت ودھیا سکول کھولے نیں جو کہ غریب لوکائی دی سیو ا کر رہے نیں۔

اسلام آباد وِچ اک پارک سکو ل اے جو فائر برگیڈ وِچ کم کرن والے اک ملازم ماسٹر ایوب نے کھولیا اے۔ایس سکول وِچ باہر کم کرن والے بال پڑھن آؤندے نیں۔ماسٹر جی بالاں کولوں فیس نہیں لیندے نہ ایکتاب کاپی دے پیسے لئے جاندے نیں۔ ایس سکول دے پڑھے بال اج کل اُچے عہدے لے چکے نیں تے اوہ اپنے ایس سکول نوں جاری رکھن وِچ ماسٹر جی دی مدد کردے نیں۔ماسٹر جی نے 4بالا ں توں ایہ سکول شروع کیتا سی جد کہ ہن 200توں ودھ بال ایس سکول وِچ پڑھ رہے نیں۔ منڈی بہاؤ دین دے ماسٹر ایوب ایس سکول نوں اپنے کم کارتوں بعد ٹائم دیندے نیں او س ویلے تیکر کم کرن والے بال وی سکول آ جاندے نیں۔کھلے آسمان تھلے چلدے ایس سکول تے ماسٹر ایوب نوں سرکاری تے جگت پدھر(عالمی سطح)تے متھیا گیا اے۔کراچی وِچ وی کجھ سکول فلائی اوور دے تھلے شروع کیتے گئے نیں ایہناں وِچوں کجھ سرکاری تحویل وِچ لے لئے گئے نیں جد کہ کجھ فلاحی ادارے چلارہے نیں۔اک پاسے اوہ سکول نیں جتھے ہر شے ہوون دے باوجود بال نہیں پڑھدے جد کہ کجھ ایہ سکول نیں جتھے دے با ل گورنمنٹ تے کارپوریٹ سکیٹر وِچ تھاں بنا گئے۔

ایہ سارے سکول کسے نا کسے روپ وِچ غریب بالاں دا بھلاکر رہے نیں۔سکھیا انسان دا ذہن کھول دیندی اے سانوں چاہیدا اے کہ ماسٹر ورگے لوکاں دی مددکرئیے تا کہ او اپنے کم نوں ہو ر ودھا سکن تے گلی محلے وِچ پھردے بال سماج دے چنگے شہری بن جاون۔ہر قوم ایہ سمجھ گئی اے کہ پئی تعلیم توں بغیر ترقی نہیں ہو سکدی تے فیر سانوں وی چاہیدا اے کہ اپنا سارا پیسا تعلیم تے خرچ کریئے۔لوکائی نوں تعلیم،صحت تے انفراسٹرکچر دے دِتا جاوے پیسا اوہ خُد زی کما لیندے نیں۔رب سانوں وی ایہناں لوکاں وانگوں چنگے کم کرن دی ہمت دے۔ آمین۔