کرونا  وایرس  دے بچاؤ واسطے  سہولتاں گھٹ نیں:چیف جسٹس گلزار احمد۔۔۔۔٭رویل نیوز٭

اسلام آباد (بیورو رپورٹ) چیف جسٹس آف پاکستان جسٹس گلزار احمد نے ملک وچ کرونا وایرس نال نبڑن لئی ناکافی سہولتاں اُتے از خُد نوٹس لے لیا۔ چیف جسٹس گلزار احمد دی اگوائی وچ سپریم کورٹ دا 5 رکنی بینچ کرونا وایرس بارے از خُد نوٹس دی سنوائی 13 اپریل نُوں کرے گا۔ سنوائی دوران کرونا وایرس نال نبڑن لئی چُکے گئے اقدامات تے ہسپتالاں وچ سہولتاں دا جایزا لیا جاوے گا۔ عدالت نے سنوائی لئی اٹارنی جنرل‘ سیکریٹری صحت‘ سیکریٹری داخلا‘ چاراں صوبائی ایڈووکیٹ جنرلز تے چیف سیکریٹریز نُوں نوٹس جاری کر دِتے نیں۔ دوجے پاسے پاکستان وچ کرونا وایرس دے روگیاں دی گنتی 4 ہزار 700 ہو گئی اے جد کہ ایس وایرس نال واصل ہون والیاں دی گنتی 68 ہو چکی اے۔ ملک وچ کرونا وایرس دے 3 ہزار896 روگی ایس ویلے وی مختلف ہسپتالاں وچ علاج ہیٹھ نیں‘ جہناں وِچوں 45 دی حالت ماڑی اے جد کہ 736 روگی کرونا وایرس توں مکمل صحت یا ب ہو چکے نیں۔ پنجاب کرونا دے روگیاں دی گنتی دے حوالے توں پہلے نمبر اُتے اے جتھے ایس وایرس نال متاثرا روگیاں دی گنتی 2 ہزار 280 تے مَوتاں 18 ہو چکیاں نیں۔ سندھ وچ کرونا دے روگیاں دی گنتی1214 جد کہ ہلاکتاں دی گنتی 22 ہو گئی اے۔ خیبر پختونخوا وچ 620 روگی تے 22 بندے چلانا کر چکے نیں‘ بلوچستان وچ 220 روگی تے 2 ہلاکتاں ہوئیاں نیں‘ گلگت بلتستان وچ 215 روگی تے 3 بندے چلانا کر چکے نیں‘ اسلام آباد وچ 118 روگی تے 1 بندا چلانا کر چکیا اے جد کہ ازاد جموں و کشمیر وچ کرونا دے 33 روگی نیں