رمضان وچ گھراں اندر عبادتاں کرو،کرونا دے روگیاں نوں روزے توں چُھوٹ  اے:نور الحق قادری۔۔۔۔۔رویل نیوز

اسلام آباد (اُچیچا نمائندا) وفاقی وزیر برائے مذہبی امور نور الحق قادری دا کہنا اے کہ کرونا وایرس نال متاثرا روگی نُوں روزا رکھن توں چُھوٹ حاصل اے۔ میڈیا نال گلبات کردیاں ہویاں اوہناں نے کہیا کہ اسلامی نظریاتی کونسل اِک آئینی ادارا اے جہدی اہمیت توں انکار نہیں کیتا جا سکدا۔ اوہناں نے کہیا کہ جمعے دی نماز گھراں اُتے ادا کیتی جاوے کیوں جے دین آسانی دا ناں اے‘ قرآن پاک تے احادیث وچ ثابت اے کہ لوکاں لئی آسانیاں پیدا کرو۔ اوہناں نے ہور کہیا کہ کرونا وایرس تے رمضان دا ساتھ رہوے گا۔ تراویح گھراں وچ ادا ہووے گی یاں مسیتاں وچ ایہ مشاورت دے بعد ای دَساں گے۔ نور الحق قادری نے کہیا کہ سارے مکاتب فکر دی اتفاق رائے نال رمضان وچ تراویح دے حوالے توں مشاورت کراں گے۔ سماجی دوری دی حکمت عملی اپنا کے گھراں وچ تراویح ادا کیتی جا سکدی اے۔ گھراں وچ جماعت دے نال نماز یاں تراویح دی ادائیگی مناسب گل ہووے گی۔ اوہناں نے کہیا کہ سعودی عرب دا کہنا اے کہ کرونا نُوں قابو کرن وچ 1 سال لگ سکدا اے۔ پورے ملک وچ لاک ڈاؤن دی صورت وچ مسیتاں نُوں بند کرن اُتے وی مشاورت کراں گے۔ وزیراعظم عمران خان پیو وانگوں قوم نُوں سمجھان دی کوشش کر رہے نیں‘ اوہ تے منت سماجت کر کے قوم توں تعاون دی اپیل کر رہے نیں