عثمان بزدار دا بغیر پروٹو کول تونسہ شریف دا دورا،امن وامان دا جائزا۔۔۔۔۔رویل نیوز

لاہور (نمائندا رویل) وزیر اعلا پنجاب سردار عثمان بزدار نے رات گئے پروٹو کول دے بغیر تونسا شریف شہر دا دورا کیتا۔ وزیر اعلا عثمان بزدار دے دورے توں انتظامی وی لاعلم رہی۔ وزیر اعلا عثمان بزدار نے شہر وچ دفعا 144 اُتے عملدرآمد دے حوالے توں کیتے جان والے اقدامات دا جایزا لیا۔ وزیر اعلا عثمان بزدار نے کرونا وباء دا کھلار روکن لئی کیتے گئے حفاظتی انتظاماں دا وی مشاہدا کیتا تے شہر وچ صفائی‘ بنیادی سہولتاں دی فراہمی تے امن و امان دی صورتحال دا جایزا لیا۔ وزیر اعلا نے شہریاں توں گھراں وچ رہن دی اپیل کردیاں ہویاں کہیا کہ تہاڈا گھر تہاڈے ساریاں لئی محفوظ اے۔ کرونا توں بچنا اے تے شہری بلا ضرورت باہر نہ نکلن۔ کرونا دے خلاف جنگ لوکائی دے تعاون نال ای جتاں گے۔ وزیر اعلا نے کہیا کہ کرونا وایرس دی وجھا توں پیدا ہون والی صورتحال احتیاط دی متقاضی اے‘ ازمایش ویلے اپنی جان ہتھیلی اُتے رکھ کے متاثرا روگیاں دا علاج کرن والے حقیقی مسیحا نیں۔ وزیر اعلا نے کہیا کہ کرونا دے دھرُکو دے باوجود د فرایض سر انجام دین والے افسراں تے اہلکاراں نُوں سلام پیش کردے آں‘ معاشی صورتحال اُتے پوری نظر اے‘ نادار طبقے نُوں کلا نہیں چھڈاں گے‘ بدلدے حالات وچ شہریاں نُوں وی اپنے روز مرا دے معمولات نُوں بدلنا پوے گا‘ خطرناک روگ نُوں شکست صرف گھراں وچ رہ کے تے سماجی فاصلے نال دِتی جا سکدی اے۔