دیہاڑی دار طبقے دیاں اوکڑاں دا احساس اے:ڈاکٹر ثانیہ نشتر۔۔۔۔٭ رویل نیوز٭

اسلام آباد (نیوز ڈیسک) معاون خصوصی ڈاکٹر ثانیہ نشتر نے کہیا اے کہ محنت کش بھراواں دیاں اوکڑاں دا احساس کردیاں ہویاں حکومت پاکستان نے احساس ایمرجنسی کیش دی 8171 ایس ایم سروس نُوں مفت کر دِتا اے۔ سماجی رابطیاں دی ویب سائٹ ٹوئٹر اُتے جاری اپنے ویڈیو بیان وچ ڈاکٹر ثانیہ نشتر نے کہیا اے کہ چالو ہفتے محنت کش بھراواں تے بھیناں نال گلبات دے دوران مینوں پتا لگا کہ ساڈے دہاڑی دار طبقے نُوں احساس ایمرجنسی پروگرام وچ ایس ایم ایس راہیں شامل ہون دے طریقے کار بارے ہور آگاہی دی ضرورت اے۔ وزیراعظم دی معاون خصوصی ثانیہ نشتر نے ایس ایم ایس توں لے کے رقم وصولی تک دا طریقا کار دَسدیاں ہویاں کہیا کہ تُسیں محنت مزدوری کردے او‘ تہاڈی آمدن کرونا وایرس دی صورتحال وچ رُک گئی ہووے تے حکومت 12 ہزار امداد دیوے گی۔ ثانیہ نشتر نے کہیا کہ امداد لین لئی موبائل توں پیغام گھلو‘ اہل متھے جاؤ تے نیڑلے بینک توں رقم ملے گی۔ امداد لین لئی طریقا کار اپنانا لازمی اے‘ حکومت تہانوں امداد ضرور مہیا کرے گی۔ اوہناں دا کہنا سی کہ دہاڑی دار‘ مزدور تے مستحقین احساس پروگرام دی امداد لئی 8171 نمبر اُتے اپنا شناختی کارڈ گھلن۔ موبائل پیغام راہیں ایس ایم ایس وچ امداد دے اہل قرار پان والے دوجے پیغام دا انتظار کرن۔ اوہناں نے کہیا کہ جے کوئی اہل متھ دِتا جاوے تے اوہنوں 8171 توں ای دوجا ایس ایم ایس آئے گا۔ دوجے ایس ایم ایس وچ اہل بندے نُوں امداد دین دی تاریخ دَسی جاوے گی۔ ثانیہ نشتر نے خبردار کردیاں ہویاں کہیا کہ کسے وی دوجے نمبر توں آن والا پیغام یاں ایس ایم ایس جعلی ہووے گا‘ لوک محتاط رہن۔ اہل بندیاں نُوں پورے 12 ہزار رُپئے ملن گے‘ کوئی کٹوتی نہیں کیتی جاوے گی۔