انسان

انسان۔۔۔۔۔

یاد اے تینوں آکھدا سی میں،
ایہجو خاک دا پُتلا اے ناں،
بڑی عجیب، ڈراونی شے اے،

ایہہ بس اپنے آپ دا عاشق،
اپنی ہوند دے کارن نوں وی،
اپنی خاطر چھڈ دیندا اے،
مسجد، مندر ، کعبہ، گنگا،
پل وچ دل چوں کڈھ دیندا اے

اپنا آپ بچاون دے لئی،
جان توں پیارے سوہنے رشتے،
ویکھدا وی نہیں دبن لگیاں،
لکھ، کروڑ دلیلاں، فتوے،
منٹ نہیں لاندا لبھن لگیاں،

یاد اے تینوں آکھدا سی میں،
ایہجو خاک دا پُتلا اے ناں،
بڑی عجیب، ڈراونی شے اے،
پر توں میری اِک نہ منیّ،
ہن وی میری کس سُننی اے۔۔۔۔۔۔۔۔