بال اَدب دی منی پرمنی امریکی لکھارن بیورلی کلیری۔۔۔۔اِک جانکاری

بال اَدب دی منی پرمنی امریکی لکھارن بیورلی کلیری۔۔۔۔اِک جانکاری

راشد محمود بٹ

بال ادب دی منی پرمنی ہوئی امریکی لکھارن بیورلی کلیری (Beverly Cleary) اَج 104 ورھیاں دے ہو گئے نیں۔ 1950ء توں لے کے، جدوں اوہناں دی پہلی کتاب چھپی، ہن تیکر اوہناں دیاں 9 کروڑ توں بُہتیاں کتاباں دُنیا بھر وچ وک چکیاں نیں، تے اوہناں نوں جیوت بال لکھاریاں وچ سبھ توں بُہتی پڑھی جان والی لکھاری منیا جاندا اے۔

کلیری دی کتاباں دے مشہور کرداراں وچ رمونا کوئمبی تے بیزس کوئمبی، ہنری ہگنس تے اوس دا کتا ربیسی تے رالف ایس ماؤس شامل نیں۔

کلیری دیاں بُہتیاں کہانیاں شمال مشرقی پورٹ لینڈ اوریگون دے گرانٹ پارک دے آسے پاسے گھمدیاں نیں، جتھے کلیری جمے پلے۔ اوہناں نوں سبھ توں پہلاں بال ادب چ جذباتی حقیقت پسندی نوں ورتن تا اعزاز حاصل اے۔ بیورلی کلیری نوں 1981ء وچ اپنی کتاب رمونا اینڈ ہر مدر (Ramona and Her Mother) لئی امریکا دا نیشنل بک ایوارڈ دتا گیا تے ڈئیر مسٹر ہینشا (Dear Mr. Henshaw) لئی اوہناں 1984ء دا نیوبیری میڈل جتیا۔ امریکی بال اَدب لئی اپنی ساری حیاتی دے کم اتے اوہناں نوں "نیشنل میڈل آف آرٹس" ملیا۔ اوہناں نوں لائبریری آف کانگریس لیونگ لیجنڈ دا خطاب تے بال لائبریری سروس دے "لورا انگلز وائلڈر میڈل" وی ملیا۔ پورٹلینڈ وچ اک سرکاری سکول دا ناں اوہناں دے ناں تے "بیورلی کلیری اسکول" رکھیا گیا۔

1995ء وچ پورٹ لینڈ دے گرانٹ پارک وچ، کلیری دیاں کتاباں دے مشہور کرداراں دے مجسمے لائے گئے۔ کلیری دی سالگرھا نوں امریکا وچ ملکی پدھر اُتے D.E.A.R. دے طور تےمنایا جاندا اے (Drop Everything and Read) (ہر شے نوں چھڈ کے پڑھو) تے ایس بارے پورے ملک وچ سیمنار تے اوہناں دے کم دیاں پڑھتاں ہوندیاں نیں۔