!بدلا سُن وے کالیا بدلا

*بدلا سُن وے کالیا بدلا! *
بدلا!
اک گل چیتے رکھیں
کِنیاں ای دِھیاں ایس فصل تے آساں لے کے بیٹھیاں ہوئیاں اسماناں وَل ویکھ رہیاں نیں
جَد وی بجلی لشکاں مارے
کوئی رووے کوئی چیکاں مارے
بُڈھے واہیوان دے لَک نُوں
ساہوکار دا قرضہ توڑ کے رکھ دیوے گا
بدلا!
ایس وساکھی اُتے
اُچیاں لمیاں کنکاں وانگوں ہسدیاں کِھڑدیاں کُڑیاں چِڑیاں
ویکھیں کِدھرے ہاسیاں اُتے جال نہ سُٹیں
ایتھے بُھکھیاں دی شنوائی کوئی نہیں ہُندی
نہ کوئی قرضامعاف کرے گا
نہ کوئی اتھرو صاف کرے گا
بدلا!
سُن وے کالیا بدلا
وائے!
سُن نی تیز ہوائے
جا بدل نُوں تھر وچ لے جا
بدلا جا کے اوتھے وَرھ جا
اوتھوں دے ترہائے لوکی
دُھپ نے سُکنے پائے لوکی
بدلا!
سُن وے کالیا بدلا
اُچے لیکھاں والیا بدلا۔۔۔۔۔۔۔۔۔۔!