عالمی بنک دا دھڑکو تے پاکستان دی معیشت،رپورٹ جاری۔۔۔۔۔٭رویل نیوز٭

اسلام آباد (نمائندا رویل) عالمی بینک نے پاکستان دی معیشت اُتے دھرُکوواں دا اظہار کردیاں ہویاں رپورٹ وچ کہیا اے کہ ملکی مجموعی قومی پیداوار 1952 دے بعد پہلی وار منفی ہون دا دھرُکو اے۔ عالمی بینک نے کرونا ویارس کارن پاکستان دی معیشت اُتے پین والے اثرات دا جایزا لیندیاں ہویاں رسک رپورٹ جاری کر دِتی اے جہدے وچ پاکستان لئی معاشی خطریاں دا اظہار کردیاں ہویاں کہیا گی ااے کہ پاکستان دی مجموعی قومی پیداوار 1952 دے بعد پہلی وار منفی ہون دا دھرُکو اے تے پاکستان دی معیشت ہور 2 سال تک دباء دا شکار رہوے گی۔رپورٹ وچ کہیا گیا اے کہ چالو مالی سال دی مجموعی قومی پیداوار دی شرح نمو منفی 1.3 فیصد تک گھٹ ہو سکدی اے‘ پاکستان دی مجموعی قومی پیداوار ایس توں پہلاں 1952 وچ تواریخ دی گھٹ ترین سطح منفی 1.80 فیصد رہی سی۔ رپورٹ دے مطابق کرونا وایرس دا کھلار پاکستان دی معیشت لئی خطرات ودھائے گا۔ اگلے مالی سال مجموعی قومی پیداوار وچ 1 فیصد تک وادھا ہووے گا‘ اگلے مالی سال وچ ترقی دی شرح اعشاریا 9 فیصد ہون دا امکانا ے تے کرونا وایرس دے کارن پاکستان دا بجٹ کسارا 8.7 توں 9.5 تک پہنچ سکدا اے تے پاکستان دی معیشت وچ قرضیاں دا حجم ودھ سکدا اے‘ جہدی وجھا توں پاکستان لئی بیرونی ادائیگیاں دا دباء ودھ سکدا اے تے پاکستان نُوں دوست ملکاں چین‘ سعودی عرب تے متحدا عرب امارات دے قرضے واپس کرن وچ اوکڑاں پیش آن گیاں۔ عالمی بینک دا کہنا اے کہ کرونا وایرس دی وجھا توں پاکستان وچ سرمایا کاری دا حجم گھٹ ہو سکدا اے۔ سرمایا کاری دا حجم گھٹ ہون نال ڈالر دی قدر ودھے گی‘ ڈالر دیق در ودھن نال پاکستان دا ایکسچینج ریٹ دباء وچ آ جاوے گا۔ رپورٹ وچ کہیا گیا اے کہ حکومتِ پاکستان دی پہلی ترجیح گھٹ آمدنی والے طبقے دا ریلیف ہونا چاہیدا اے۔ ورلڈ بینک نے دھرُکو ظاہر کیتا اے کہ پاکستان سنے جنوبی ایشیا کرونا وایرس دا مرکز بن سکدا اے جہدی وجھا توں پاکستان‘ بھارت‘ بنگلا دیش‘ افغانستان‘ سری لنکا تے ہور ملکاں دی معیشت متاثر ہووے گی۔ ورلڈ بینک دا کہنا اے کہ پوری دنیا توں درآمدی آرڈرز وچ کمی نال ایہناں ملکاں دی معیشت متاثر ہووے گی تے صحت دے نظام نُوں بہتر بنان لئی حکومتاں نُوں فوری اقدامات کرنے پین گے۔