بھارتی مسلماناں دے حق خطرے وچ نیں، مسلماناں نال اجہیا سلوک کیوں؟ تفصیل جانن لئی۔۔۔۔۔٭رویل نیوز٭

واشنگٹن (اُچیچا نمائندا) اِک جانی پچھانی جگت پدھر دی تنظیم نے بھار ت توں منگ کیتی اے کہ اوہ ایس امتیازی سلوک دے حامل شہریت ترمیمی قانون تے پالیسیاں نُوں منسوخ کرے جہدے نال لکھاں بھارتی مسلماناں دے حقاں نُوں خطرا اے تے ملک دے سبھ توں وڈے اقلیتی گرُپ تے ہور برادریاں وچ خوف و ہراس کھلر رہیا اے۔ 82 صفحیاں اُتے مشتمل رپورٹ جہدا عنوان ”باغیاں نُوں گولی مار دوو: بھارت دے شہریت ترمیمی قانون دے تحت مسلماناں خلاف امتیازی سلوک“ وچ ہیومن رائٹس واچ (ایچ آر ڈبلیو) نے کہیا کہ متنازع شہریت ترمیمی قانون دے تحت غیر قانونی تارکین وطن دی شناخت دے ناں اُتے لکھاں بھارتی مسلماناں دی شہریت لئی خطرا پیدا کر دِتا۔ رپورٹ وچ ایہ وی کہیا گیا کہ وزیر داخلا تے بھارتیا جنتا پارٹی (بی جے پی) دے ہور آگوواں دے بیاناں نال ایہ دھرُکو پیدا ہویا کہ لکھاں بھارتی مسلمان‘ جہناں وِچوں کئی خاندان کئی نسلاں توں ملک وچ رہ چکے نیں‘ اوہناں دی شہریت دے حق کھوہ لئے جان گے۔ ایچ آر ڈبلیو نے اپنی رپورٹ وچ ایہ وی کہیا کہ جدوں شہریاں دیاں نویاں پالیسیاں اُتے احتجاج کرن والیاں اُتے حکومتی حامیاں نے حملا کیتا تے پولیس تے ہور اہلکار وار وار مداخلت کرن وچ ناکام رہے سن۔ رپورٹ وچ ہور کہیا گیا کہ پولیس پالیسی دے ناقدین نُوں گرفتار کرن تے اوہناں دے پرامن مظاہرے نُوں منتشر کرن وچ لوڑ توں ودھ تے مہلک طاقت دا استعمال کر رہی اے۔ ایچ آر ڈبلیو ساؤتھ ایشیا دے ڈائریکٹر مینا کشی گنگولی نے کہیا کہ حکومتی پالیسیاں نے تشدد دا راہ کھول دبتا اے تے پولیس دی عدم فعالیت نے پورے ملک وچ مسلماناں تے ہور اقلیتی برادریاں وچ خوف نُوں جنم دِتا۔ ایچ آر ڈبلیو نے بھارتی حکومت اُتے زور دِتا کہ اوہ ترمیم نُوں منسوخ کرے تے ایس گل نُوں یقینی بنان کہ اگے توں کسے وی قومی‘ سیاسی پناہ تے پناہ گزین دی پالیسی توں متعلق امتیازی سلوک نہ کرے۔