ہر دیس واسی دے حقاں دی راکھی کرنی اے:فردوس عاشق اعوان۔۔۔۔۔٭رویل نیوز٭

اسلام آباد (بیورو رپورٹ) معاون خصوصی برائے اطلاعات و نشریات ڈاکٹر فردوس عاشق اعوان نے کہیا اے کہ وزیراعظم عمران خان ساریاں اکائیاں وچ وَسن والے پاکستانیاں دے حقاں دے تحفظ دے ضامن نیں۔ سماجی رابطیاں دی ویب سائٹ ٹویٹر اُتے اپنی اِک ٹویٹ وچ فردوس عاشق اعوان نے کہیا کہ سبھ جاندے نیں کہ نیشنل کوآرڈینیشن کمیٹی وچ فیصلے مشاورت نال طے پاندے نیں تے وزیر اعلا سندھ ایس کمیٹی دے رکن نیں۔ سندھ دی لوکائی پاکستان دے شہری نیں۔ وزیراعظم عمرن خان ساریاں اکائیاں وچ وَسن والے پاکستانیاں دے حقاں دے تحفظ دے ضامن نیں۔ معاون خصوصی دا کہنا سی کہ بلاول بھٹو زرداری دا بیان کرونا خلاف جنگ وچ قومی اکسُرتا دی فضا پارا پارا کرن وانگوں اے۔ 18 ویں ترمیم دے بعد صحت دا شعبا صوبیاں دے دایرا اختیار وچ اے۔ پچھلے اِک دہاکے توں ودھ عرصے توں سندھ وچ پیپلز پارٹی دی حکومت قایم اے‘ ایہ سیاست چمکان دا ویلا نہیں‘ متحد ہو کے سارے وسایل اتعمال وچ لیاندیاں ہویاں کرونا وایرس نوں شکست دینی اے۔واضح رہوے کہ پچھلے دن بلاول نے اپنے اِک انٹرویو وچ کہیا سی کہ کرونا اُتے قابو پان لئی وفاقی حکومت سست روی نال کم کر رہی اے‘ کرونا خلاف صوبے اپنے اپنے طور اُتے کم کر رہے نیں تے ایس حوالے توں وفاق ولوں بہت گھٹ امداد مل رہی اے۔