لاک ڈاؤن بارے نرمی دا فیصلا کرن لئی اجلاس  اَج ہووے گا۔۔۔۔۔٭رویل نیوز٭

اسلام آباد (نمائندا رویل)قومی رابطا کمیٹی دا اجلاس اج دُبارا سَد لیا گیا جہدے وچ لاک ڈاؤن وچ وادھا یاں نرمی بارے فیصلا کیتا جاوے گا۔ وزیراعظم عمران خان دی صدارت ہیٹھ قومی رابطا کمیٹی دا اجلاس ہویا جہدے وچ چاراں صوبیاں دے وزرائے اعلا‘ وفاقی وزراء‘ عسکری تے سول اداریاں دے اعلا حکام سنے چیئرمین این ڈی ایم اے نے رلت کیتی۔ اجلاس وچ کمانڈ سینٹر ولوں کرونا دی موجودا صورتحال دے آنکڑیاں توں ا گاہ کیتا گیا جد کہ کرونا وایرس دی موجودا صورتحال‘ صوبائی سطح اُتے اقدامات تے ریلیف پیکجز اُتے عملدرآمد دا جایزا وی لیا گیا۔ وزیراعظم عمران خان دی صدارت ہیٹھ قومی رابطا کمیٹی دے اج ہون والے اجلاس وچ وفاق تے صوبیاں نے لاک ڈاؤن بارے پالیسی اُتے اتفاق کیتا۔ دوجے پاسے وسیلیاں مطابق قومی رابطا کمیٹی دا اجلاس کل دُبارا سدیا گیا اے جہدے و چ لاک ڈاؤن وچ وادھے یاں نرمی بارے فیصلے کیتے جان گے۔ اجلاس وچ ویڈیو لنک راہیں رلت کرن والے وزیر اعلا سندھ سید مراد علی شاہ نے لاک ڈاؤن ہور 14 دن لئی ودھان نے منگ کردیاں ہویاں کہیا اے کہ جہناں سیکٹرز نُوں کھولنا اے‘ اوہدا ایس او پی دوو‘ عملدرآمد کراواں گے‘ ایس اہم صورتحال وچ ساڈی قومی پالیسی ہونی چاہیدی اے‘ فیصلے وزیراعظم ولوں آنے چاہیدے نیں‘ اسیں مناں گے۔ صوبے وچ کرونا کیسز دی گنتی ودھ رہی اے‘ ساڈے لوک مَر رہے نیں۔ اوہناں دا کہنا سی کہ لاک ڈاؤن نہیں ودھانا تے ایہ وی فیصلا وزیراعظم ولوں آنا چاہیدا اے‘ تُسیں اعلان کرو‘ جو تُسیں چاہوو گے‘ اسیں عملدرآمد کراواں گے۔مراد علی شاہ دا کہنا سی کہ جہناں لوکاں نوں نقدی دے رہے او‘ اوہناں توں 14 دن گھراں وچ رہن دی گارنٹی لوو۔ ایہدے علاوا فوڈ آئٹمز دی ایکسپورٹ اُتے پابندی لانی چاہیدی اے‘ جے اسیں سر پلس وی ہوئیے فیر وی ایکسپورٹ روک دوو۔ دوجے پاسے فاقی وزیر برائے منصوبا بندی اسد عمر نے کہیا اے کہ 15 اپریل بعد کیہ کرنا اے؟ ایہ فیصلا اج منگل نُوں قومی رابطا کمیٹی دے اجلاس وچ ہووے گا پر کوشش ہووے گی کہ فیصلے وفاق تے صوبیاں دی مشاورت نال ہون‘ بحثیت قوم پاکستانیاں نے ذمے داری دا مظاہرا کیتا جہدے چنگے نتیجے آ رہے نیں۔ صوبائی تے وفاقی حکومت نے ویلے سر فیصلے کیتے۔ اوہناں دا کہنا سی کہ جہڑے کاروبار چلا رہے نیں اوہناں دی ذمے داری ہووے گی کہ اوہ ملازماں دی صحت دا خیال رکھن‘ ایہدے لئی قانون سازی وی غور ہیٹھ اے۔