سپریم کورٹ دے حکومتی عہدے داراں  بارے سخت بیان، قانون بناون دے حوالے توں حکومت دا کیہ ارادا  اے؟چیف جسٹس ۔۔۔۔۔٭رویل نیوز٭

اسلام آباد (نمائندا رویل) کرونا وایرس از خُد نوٹس کیس دی سنوائی دوران سپریم کورٹ نے حکومت نُوں ڈاکٹر ظفر مرزا نُوں عہدے تو ہٹان دا کَہ دِتا۔ سپریم کورٹ وچ کرونا وایرس از خُد نوٹس دی سنوائی ہوئی جہدے وچ عدالت نے حکومتی ٹیم تے اوہدی کمکاری اُتے سوال چُک دبتے۔ چیف جسٹس گلزار احمد نے ریمارکس دِتے کہ سمجھ نہیں آ رہی کس قسم دی ٹیم کرونا اُتے کم کر رہی اے‘ اعلا حکومتی عہدیداران اُتے سنجیدا الزامات نیں‘ ظفر مرزا کس حد تک شفاف نیں کجھ نہیں کَہ سکدے جد کہ معاونین خصوصی دی پوری فوج اے جہناں دے کول وزیراں دے اختیارات نیں تے کئی کابینا ارکان اُتے جرائم وچ ملوث ہون دے مبینا الزامات نیں۔ اٹارنی جنرل نے کہیا کہ عدالت دی آبزرویشن نال نقصان ہووے گا جہدے اُتے چیف جسٹس نے کہیا کہ ریمارکس دین وچ بہت احتیاط ورت رہے آں‘ عدالت نُوں حکومتی ٹیم نے صرف آنکڑے دَسے‘ اٹارنی جنرل نے کہیا کہ کوئی ملک کرونا نال لڑن لئی پیشگی تیار نہیں سی‘ چیف جسٹس نے پُچھیا کہ قانون سازی دے حوالے توں حکومت دا کیہ ارادا اے‘ ایمرجنسی نال نبڑن لئی پارلیمان قانون سازی کرے گا‘ کئی ملک ایمرجنسی نال نبڑن لئی قانون سازی کر چکے نیں۔ چیف جسٹس ریمارکس وچ کہیا کہ ریاستی مشینری نُوں اجلاساں دے علاوا وی کم کرنے ہوندے نیں‘ وزیراعظم دی کابینا غیر مؤثر ہو چکی اے‘ معذرت دے نال پر وزیراعظم نے اپنے آپ نُوں الگ تھلک رکھیا ہویا اے‘ کیہ پارلیمنٹیرینز پارلیمنٹ وچ بیٹھن توں گھبرا رہے نیں‘ وفاقی تے صوبائی حکومتاں اپنے اپنے راہ اختیار کیتے ہوئے نیں۔ سنوائی دوران سپریم کورٹ نے حکومت نُوں ڈاکٹر ظفر مرزا نُوں عہدے توں ہٹان دا کہیا‘ چیف جسٹس نے ریمارکس وچ کہیا کہ عدالت ڈاکٹر ظفر مرزا دے کم توں خُش نہیں‘ ڈاکٹر ظفر مرزا دے حوالے توں اج اہم حکم جاری کراں گے۔ اٹارنی جنرل نے عدالت نُوں کہیا کہ ایس موقع اُتے ڈاکٹر ظفر مرزا نُوں ہٹانا تباہ کن ہووے گا پر حکومت نُوں عدالت دے تحفظات توں اگاہ کراں گا۔ جسٹس عمر عطاء بندیال نے ریمارکس وچ کہیا کہ ملک وچ معیشت دا پہیا چلانا پوے گا‘ اسیں لوکاں نُوں بھکھ نال مردا نہیں ویکھ سکدے۔ جسٹس قاضی امین نے ریمارکس دِتے کہ لوکاں نُوں گھراں اُتے بند کر دِتا گیا اے حکومت اوہناں تک پہنچے‘ عام بندے نُوں پولیس پھڑ کے جُتیاں مار رہی اے‘ لوک بھُکھ نال تلملا رہے نیں اسیں انار ول ودھ رہے آں۔ چیف جسٹس نے ریمارکس دِتے حکومت لوکاں نُوں سپورٹ کرے تے اوہ گل منن گے‘ لاک ڈاؤن دا مطلب کرفیو ہوندا اے‘ کیہ کراچی دیاں متاثرا 11 یونین کونسلز دے ہر مکین دا ٹیسٹ ہووے گا جد کہ سیل کیتیاں گئیاں 11 یونین کونسلز دی کنی آبادی اے‘ ایڈووکیٹ جنرل سندھ نے کہیا کہ متاثرین یونین کونسلز دی ابادی دا صحیح پتا نہیں پر متاثرین یونین کونسل وچ کھان پین دیاں دُکاناں کھُلیاں نیں۔ چیف جسٹس نے کہیا کہ حکومت بھاویں 100 وار لاک ڈاؤن کجرے‘ عدالت نُوں کوئی ایشو نہیں پر لاک ڈاؤن لان توں پہلے حکومت کول پلان وی ہونا چاہیدا اے۔ جسٹس سجاد علی شاہ نے پُچھیا کہ سندھ وچ لوکاں دی مدد لئی حکومتی سطح اُتے کیہ اقدامات کیتے گئے‘ سندھ حکومت نے 8 ارب دا راشن ونڈیا پر غریب نُوں پتا وی نہیں لگا جہدے اُتے ایڈووکیٹ جنرل سندھ نے کہیا کہ سندھ وچ 5 لکھ توں ودھ لوکاں نُوں راشن فراہم کیتا۔جسٹس سجاد علی شاہ نے پُچھیا کہ کتھے تے کہنوں راشن فراہم کیتا‘ سندھ پولیس تے جے ڈی سی والیاں نُوں لُٹ رہی اے‘ 10 رُپئے دی شے دے کے 4 وزیر تصویر بنان لئی کھلو جاندے نیں۔ ایڈووکیٹ جنرل سندھ نے عدالت نُوں دَسیا کہ 5 لکھ 4 ہزار 80 خانداناں نُوں 15 دن دا راشن دِتا‘ ہر خاندان وچ بندیاں دا تخمینا لا کے راشن دِتا گیا اے۔ چیف جسٹس نے ریمارکس وچ کہیا کہ فیر تے 1 من آٹے دی بوری چاہیدی ہووے گی اِک خاندان لئی‘ تُسیں راشن دین دا کَہ دِتا اسیں سن لیا‘ ہُن ویکھدے آں قوم مندی اے یاں نہیں‘ سندھ وچ لوک سڑکاں اُتے نیں‘ سندھ دے لوک کَہ رہے نیں حکومت نے اِک ٹَکا وی نہیں دِتا‘ ایہ سوالات صرف سندھ لئی نہیں سگوں چاراں صوبیاں لئی نیں‘ کے پی کے تے راشن دی بجائے نقدم رقم ونڈ رہیا اے۔سپریم کورٹ نے حکومت توں اج ہون والے اجلکاس دے فیصلیاں دی تفصیلات منگدیاں ہویاں کہیا کہ کراچی وچ 11 یونین کونسلز سیل کرن دی وجھا نہیں دَسی گئی‘ سندھ حکومت نُوں سیل شدا یونین کونسلز وچ متاثرا بندیاں دی گنتی دا وی پتا نہیں جد کہ ایہناں یونین کونسلز وچ کھانا تے طبی امداد فراہم کرن دا کوئی منصوبا نہیں۔ عدالت نے کہیا کہ سندھ حکومت 8 ارب دا راشن ونڈن دے شواہد وی پیش نہیں کر سکی‘ سندھ حکومت دی کمکاری افسوسناک اے‘ پورے سندھ وچ کھانا نہ ملن دیاں شکایتاں پہنچ رہیاں نیں‘ دَسیا جاوے راشن کتھوں تے کنے وچ خریدیا گیا۔ عدالت نے اسلام آباد انتظامیا تے پنجاب سرکار توں وی کرونا نال نبڑن تے امدادی