پاکستانی سائنسدان نے کرونا دے روگیاں دے علاج لئی  انٹرا وینیس امیونو گلوبیولن تیار کر لئی۔۔۔۔۔٭رویل نیوز٭

کراچی (نمائندا رویل) ڈاؤ یونیورسٹی دے ماہرین نے کرونا دے علاج لئی انٹرا وینیس امیونو گلوبیولن تیار کر لئی۔ کرونا وایرس خلاف جنگ وچ پاکستانی سائنسدان نے اہم کامیابی حاصل کرن دا دعوا کیتا اے۔ ڈاؤ یونیورسٹی دی ریسرچ ٹیم نے کووڈ 19 دے صحت یاب روگیاں دے خون توں حاصل شدا اینٹی باڈیز توں انٹرا وینیس امیونو گلوبیولن (آئی وی آئی جی) تیار کر لئی جہدے راہیں کرونا متاثرین دا علاج کیتا جا سکے گا۔ ڈاؤ یونیورسٹی اعلامیے مطابق ڈاؤ کالج آف بائیو ٹیکنالوجی دے پرنسپل پروفیسر شوکت علی دی اگوائی وچ ریسرچ ٹیم نے دنیا وچ پہلی وار کرونا دے علاج لئی امیونو گلوبیولن دا مؤثر طریقا اختیار کرن دی تیاری مکمل کر لئی۔ امریکی ادارے ایف ڈی اے توں منظور شدا ایہ طریقا علاج محفوظ‘ لورسک تے کرونا خلاف انتہائی مؤثر اے جہدے وچ کرونا توں صحتیاب روگی دے خون نمو پان والیاں اینٹی باڈیز نُوں وکھرا کرن دے بعد صاف کر کے امیونو گلوبیولن تیار کیتی جاندی اے۔ ڈاؤ یونیورسٹی دی ٹیم خون دے نمونیاں دے پلازمے نال اینٹی باڈیزنُوں کیمیائی طور اُتے الگ تھلک کرن‘ صاف شفا کرن تے بعد وچ الٹرا فلٹر تکنیک راہیں ایہناں اینٹی باڈیز نُوں مرتکز کرن وچ کامیاب ہو گئی۔ ماہرین مطابق ایہ طریقا غیر متحرک مامونیٹ (پے سو امیونائزیشن) دی ای اِک قسم اے پر ایہدے وچ مکمل پلازما استعمال کرن دی بجائے ایہنوں شفاف کر کے صرف اینٹی باڈیز ای لئے جاندے نیں۔ وسیلیاں مطابق ریسرچ ٹیم نے کووڈ نائینٹین دے صحتیاب روگیاں ولوں گھٹ ماترا وچ عطیا کیتے گئے خون نُوں صاف کر کے اینٹی باڈیز وکھریاں ں کیتیاں جہڑیاں کرونا نُوں غیر مؤثر کر چکیاں سن اوہناں دی لیبارٹری ٹیسٹنگ تے حیواناں اُتے اوہدا سیفٹی ٹرائل کر کے حاصل ہون والی ہائپر امیونو گلوبیولن نُوں کامیابی دے نال تجرباتی بنیاداں اُتے انجیکشن دیاں شیشیاں (وائلز) وچ محفوظ کر لیا۔ ڈاؤ یونیورسٹی نے نویں کرونا وایرس دے خلاف کیتیاں جان والیاں کوششاں وچ اہم کردار دا جینیاتی سیکوینس پتا کیتا‘ انسانی جین وچ ایہو جہیاں تبدیلیاں دا پتا لایا یاں جہڑیاں کرونا وایرس دے خلاف مزاحمت فراہم کر سکدیاں نیں تے ہُن صحت یاب روگیاں دے خون توں حاصل شدا اینٹی باڈی توں انٹرا وینس امینو گلو بیولن تیار کیتی۔