kraamaat@gmail.com
+ +92 333-430-6384


کیہ حکومت کرونا وایرس نوں شکست دے پائے گی؟/شیخ انور


خاص لیکھ April 14, 2020


کیہ حکومت کرونا وایرس نوں شکست دے پائے گی؟/شیخ انور

چین دے شہر ووہان توں کھلرن والے کرونا وایرس نے دنیا نوں ہلا کے رکھ دتا اے۔ ایس مہلک روگ پاروں ساری دنیا وچ روگیاں دی گنتی 17لکھ دے لگ بھگ ہو چکی اے تے ایس گنتی وچ ہر لنگھدے دیہاڑ دے نال وادھا ہونداجارہیا اے۔ بین الاقوامی میڈیا رپورٹس مطابق دنیا بھر وچ کرونا وایرس نال موتاں دا سلسلا رُک نہیں سکیا۔ دنیا دے 199 ملکاں تے آپ مختیار علاقیاں وچ کھلرن والے کرونا وایرس نال مرن والیاں دی گنتی اک لکھ دے نیڑے اپڑ چکی اے۔ ایس جان لیوا وبا توں اٹلی وچ سبھ توں ودھ موتاں ہوئیاں نیں۔ سارے اقدامات دے باوجود ترقی پذیر ملکاں دے نال نال ترقی یافتا ملک وی ایس عالمی وبا اگے بے وس نظر آرہے نیں۔ کرونا اک عالمی وبا دی صورت وچ عالم انسانیت نوں عذاب وچ مبتلا کررہیا اے۔ دنیا دے سارے ملکاں وانگ کرونا وایرس پاکستان وچ وی اپڑ چکیا اے۔

ملک بھر وچ کرونا وایرس دے مجموعی روگیاں دی گنتی چار ہزار توں ٹپ گئی اے جد کہ 70 دے نیڑے تیڑے بندے جان دی بازی ہار چکے نیں۔ کرونا دے کھلار نوں روکن لئی حکومتی سطح اتے کوششاں جاری نیں۔ ایس سلسلے وچ پاکستان دے چارے صوبیاں، گلگت بلتستان تے ازاد کشمیر وچ لاک ڈاؤن جاری اے پر افسوس کہ پاکستان دی لوکائی لاک ڈاون اُتے گھٹ ای عمل کررہی اے۔ لوکائی نوں کرونا توں بچان لئی حکومت نے جے یونیورسٹیاں، کالج، سکول تے مارکیٹاں بند کیتیاں نیں تے لوک گھراں وچ بیٹھن دے بجائے سڑکاں اُتے کرکٹ کھیڈن وچ مصروف نیں۔ پاکستانی قوم نوں ایہ سبھ کھیڈ تماشا لگ رہیا اے۔ کجھ لوک رولا پارہے نیں کہ ایہ سبھ کیوں کیتا جارہیا اے تے کجھ لوک لاک ڈاون دی خُشی وچ گھراں وچ دعوتاں اُڈان وچ مصروف نیں۔ حالے تیکرپاکستانی قوم نے ایس مسئلے نوں سنجیدگی نال نہیں لیا۔ خطرا ایہ اے کہ جدوں روگ وگڑدا اے تے سوائے وینٹی لیٹر دے کوئی چارا ممکن نہیں تے روگی نوں وینٹی لیٹر نہ ملن دا مطلب موت اے۔ دستیاب آنکڑیاں مطابق پورے ملک وچ صرف 2500 دے نیڑے وینٹی لیٹرز موجود نیں جہڑے کہ ناکافی نیں۔

اٹلی وچ تباہی دا اصل کارن وی اوتھے دی لوکائی دا عدم تعاون اے جہناں حکومتی لاک ڈاون خلاف جلوس شروع کردتے سن تے اج حالتِ زار اے کہ موتاں ایس قدر ودھ گئیاں نیں کہ لاشاں نوں شاول راہیں چک کے ٹرکاں اُتے پاکے ڈونگھیائی وچ اجتماعی طور تے دفنایا جارہیا اے تے ایہو صورتحال سپین دی اے تے امریکا ورگی سپر پاور وی ایس موذی بیماری ساہمنے بے وسی وکھالی دیندی اے۔ وفاقی حکومت نے 1کروڑ 20 لکھ مستحق خانداناں لئی 100 ارب دا حکومتی پیکج دا اعلان کیتا اے جہڑا خش آیند اے۔ مزدور طبقیاں نوں ریلیف دین لئی وزیراعظم عمران خان تے اوہناں دی کابینا جہڑے فیصلے کررہی اے جے اوہدے اُتے عمل درآمد ہووے تے ایہ تحسین جوگ گل اے۔

ساڈے کول ایس بیماری نال نبڑن دا واحد حل احتیاط اے تے فیصلا لوکائی نے آپے کرنا اے کہ لاک ڈاون وچ سیر سپاٹے کرنے نیں یاں گھراں وچ بند ہونا اے۔ لوکائی نوں چاہیدا اے کہ حکومت نال تعاون کرن تاں جے کرونا خلاف جنگ جتی جاسکے تے فیر دُبارا ایس نظام زندگی نوں بحال کیتا جا سکے پر افسوس کہ اسیں کرونا نال لڑن دی بجائے آپس وچ لڑ رہے آں۔ کرونا دی وبا توں اللہ تعالی نے ساری انسانیت تے خاص طور تے ساری مسلم اُمت نوں ایہ پیغام دتا اے کہ دنیا دے مادی، ساینسی تے ٹیکنالوجی تے ترقی دی بنیاد اُتے آپ اللہ تے اوہدے رسولؐ دے دسے ہوئے رستے نوں چھڈ کے شیطانی رستا اختیار کرچکے آں جہڑا کہ تباہی تے بربادی دا رستا اے۔ سارے امت مسلما توں اپیل اے کہ فوری صحیح تے صراط مستقیم دے رستے نوں اختیار کرکے اپنی انفرادی تے اجتماعی زندگی نوں بہتر کر لین تے رب توں دعا کرن کہ اللہ سوانوں صحیح رستے اتے ٹرن دی توفیق عطا فرمائے تے اپنی غیبی مدد نال سانوں ایس وبا توں نجات عطا فرمائے۔ آمین۔

حکومت دستیاب وسایل توں لوکائی نوں ریلیف دین دی کوشش کرہی اے جد کہ کجھ لوک جان بجھ کے کھان پِین دیاں شیواں دا بحران پیدا کرکے لوکائی لئی مشکلاں پیدا کررہے نیں۔ ایہدے وچ دو راواں نہیں کہ ناجایز منافع خوری راہیں عام بندے دی بوجی اُتے ہتھ صارف کرن والے کسے رعایت دے مستحق نہیں نیں۔ ہُن جد کہ ملک وچ پیٹرولیم مصنوعات دیاں قیمتاں گھٹ کیتیاں جا چکیاں نیں، آٹا، چینی دے نرخاں دی سخت نگرانی کیتی جارہی اے۔ وفاقی تے صوبائی حکومتاں ولوں انج دے اقدامات کرن دی لوڑ اے جہدے نتیجے ناجایز منافع خوراں تے ذخیرا اندوزاں نوں آہنی ہتھاں نال دبیا جاسکے تاں جے لوکائی نوں مصنوعی مہنگائی توں نجات مل سکے۔

کرونا وایرس بے قابو جن پاروں جدوں پوری دنیا بے بسی دا شکار کاروباری مرکزاں فیکٹریاں بند نیں تے ہر کسے نوں 2 ویلے دی روٹی دے لالے پئے نیں تے کسے صورت لوکائی دا فرض اے کہ حکومت ولوں جاری ہدایتاں اتے عمل کرن۔ جے اسیں انج ای لاک ڈاون دے حوالے نال حکومت دے احکامات ہوا وچ اُڈاندے رہے تے فیر کرونا دی وبا نال نبڑیا نہیں جاسکدا۔ہن لوڑ ایس گل دی اے کہ اسیں سارے مسایل نوں مد نظر رکھدے ہوئے سبھ توں ودھ مزدور طبقے دا خیال رکھیے۔ ایہ اوہ لوک نیں جہناں دا گزارا محنت مزدوری اتے ہوندا سی۔ ایہ لوک روزانا دی بنیاد اُتے کما کے کھاندے سن۔ ہن جد کہ کرونا پاروں ایہ لوک گھراں وچ بیٹھن اتے مجبور نیں تے حکومت سبھ توں پہلے ایہناں مزدور طبقیاں نوں فوری ریلیف دیوے۔

پورے ملک وچ کرونا دے کیسز وچ وادھے دے حوالے نال نال حکومتی حلقیاں وچ وی تشویش پائی جارہی اے۔ بے شک رجوع الہی، سماجی فاصلا تے انج دے ای احتیاطی اقدامات توں وکھ ایس مہلک وبا توں نجات دا کوئی رستا نہیں۔ جے ہوندا تے وڈیاں وڈیاں سپر طاقتاں سارے وسایل تے خزانیاں دے نال اینے لاچار، بے وس تے معذور نظر نہ آوندیاں۔ میرے رب ولوں معمولی جہی ازمایش کیہ آئی، طاقت دے نشے وچ دھت ایہناں سبھ ایٹمی طاقتاں دے ہوش ٹکانے آگئے۔ اج ساری دنیا ایس گل دا اقرار کررہی اے کہ بے شک اللہ ای دی بادشاہی اے تے قیامت تیکر ایہدی بادشاہی قایم و داہم رہوے گی۔ کرونا وایرس مشرق توں مغرب تے شمال توں جنوب تیکر پوری دنیا نوں اپنی لویٹ وچ لے چکیااے۔دھرتی اُتےاک وی انج دا ملک یاں انج دا کونا نہیں جہڑا ایس وبا دا شکار نہ ہووے۔

حکومت دے اعلان مطابق سارے ملک وچ لاک ڈاون جاری اے۔ سارے مواصلاتی نظام جام، سڑکاں سنسان، ہوائی اڈے ویران تے ریل گڈیاں دا پہیا جام اے۔ سارے سرکاری تے نجی دفتر، مارکیٹاں تے دکاناں بند نیں۔ مسیتاں وچ 50 سال توں ودھ عمر دے لوکائی نوں جان توں روک دتا گیا اے۔ جد کہ بیت اللہ تے روضہءرسولؐ وی بند کردتا گیا اے طواف وی بند کردتا اے۔ لوکائی نوں گھراں وچ رہن دی سختی نال ہدایت کیتی جارہی اے تاں جے کرونا توں بچیا جاسکے۔ ایس ہدایت اتے عمل درآمد لئی فوج، پولیس تے ہور قانون نافذ کرن والے اداریاں دیاں خدمتاں لئیاں گئیاں نیں۔