سویڈن دے شاعر توماس ٹرانسٹرومر

سویڈن دے شاعر توماس ٹرانسٹرومر

2011ء دے ساہت دے نوبیل انعام جیتو سویڈن دے شاعر "توماس ٹرانسٹرومر" Tomas Transtromer دا اج 89واں جنم دیہاڑ ہے۔ ٹرانسٹرومر دا جم 15 اپریل 1931ء نوں اسٹاک ہوم سویڈن وچ ہویا، اوہناں نوں دوجی جنگ عظیم توں بعد والے زمانے دا سکینڈینوین دا وڈا ساہت کار منیا جاندا اے۔ نالے اوہ 1974 ء توں بعد پہلے سویڈش ساہت نے جہناں نوں نوبیل انعام ملیا۔

ٹرانسٹرومر دی شاعری دا ہن تیکر 60 توں ودھ زباناں وچ ترجما ہو چکیا اے. 2004ء وچ اوہناں دی نظماں دی کتاب " دا گریٹ انگما" (وڈی پہیلی) چھپی، ایس توں پہلاں 2001ء چ "دا ہاف فینشڈ ہیون"۔ اوہناں دی نظماں دی پہلی کتاب "17 نظماں" 1954ء وچ چھپی جدوں اوہ 23 ورھیاں دے سن تے نفسیات پڑھدے پئے سن۔

اوہناں دیاں نظماں وچ سویڈن دے لمے سیال دے دناں، تے فطرت دی سندرتا، پڑھن والیاں آگے آؤندی اے۔ ایہدے نال دھرم وی اوہناں دی کویتاواں دا اک حصا اے۔ توماس ٹرانسٹرومر نوں 1990ء وچ امریکا دا "نیوزدات ساہت انعام" وی ملیا، اے اوہی ورھا سی جدوں اوہناں دی بول چال فالج دے دَورے توں متاثر ہوئی۔ 26 مارچ 2015ء نوں، اپنے 84 ویں جنم دیہاڑ توں تِن ہفتیاں پہلے ٹرانسٹرومر اسٹاک ہوم وچ وفات پا گئے۔