لاک ڈاؤن بارے کرڑے فیصلے کردے رہواں گے،لوکائی دا جیون بچانا اے:سندھ سرکار ۔۔۔۔٭رویل نیوز٭

کراچی (نمائندا رویل) سندھ سرکار دا اگلے 2 ہفتے لاک ڈاؤن ہو سخت کرن دا اعلان‘ ڈبل سواری اُتے پابندی ہووے گی پر سوانیاں نال ڈبل سواری دی اجازت ہووے گی‘ 5 وجے دے بعد لاک ڈاؤن وچ ہور سختی کیتی جاوے گی۔ کراچی وچ پریس کانفرنس کردیاں ہویاں وزیر اعلا سندھ سید مراد علی شاہ نے کہیا کہ لاک ڈاؤن وچ کوئی نرمی نہیں ہو رہی اے سگوں ہور سخت کراں گے‘ ایہو جہیاں مَوتاں جہڑیاں غیر واضح نیں اوہناں نُوں ویکھنا پوے گا کدھرے اسیں غلط تے نہیں جا رہے‘ حالے 100 مَوتاں ہوئیاں نیں تے ادھی تشویش اے‘ ساڈی ٹیسٹنگ پازیٹو آ رہی اے‘ اوہ دنیا دی ایورج دے برابر اے‘ ڈبلیو ایچ او نے کہیا اے کہ سوائے سندھ دے ٹیسٹنگ ایس او پی باقی تھاواں فا لو نہیں ہو رہی اے‘ ساڈے 10 فیصد کیسز آئے نیں‘ میں اپنی تشویش دا اظہار ہر فورم اُتے کیتا اے‘ حالے وی ایس گل اُتے یقین کر رہیا آں کہ جے اسیں لاک ڈاؤن اُتے سختی کراں گے تے ایہدا فایدا ساریاں نُوں ہووے گا‘ اوہناں نے کہیا کہ بہت سارے لوک ایہو جہے نیں جہڑے کرونا وایرس وچ مبتلا نیں پر پتا نہیں‘ 15 مشتبا روگی کرونا سسپیکٹ سن‘ ایس حساب نال سندھ وچ 55 کرونا نال انتقال کر گئے نیں‘ کل وفاقی حکومت دے نال گل ہوئی سی اوہدوں 93 مَوتاں سن جہڑیاں توقع توں گھٹ سن‘ ماہرین نے کہیا کہ مَوتاں 190 یاں 200 ہوئیاں تے تشویش دی گل اے‘ کئی مَوتاں رپورٹ نہیں ہوئیاں‘ وزیر اعلا سندھ نے کہیا کہ لوکائی ساڈا ساتھ دیوے میں آپ ایس او پیز اُتے عمل کردا آں‘ سوانیاں دے سو ا ڈبل سواری دی اجازت نہیں اے‘ موٹر سائیکل اُتے 3`4 بچیاں دی اجازت نہیں ہووے گی‘ نیک نیتی نال کم کر رہے آں کسے نُوں لاک ڈاؤن توڑن تے لوکائی دیاں جاناں نال کھیڈن دی اجازت نہیں دواں گے۔ علماء کرام توں مدد تے تعاون حاصل کراں گے سندھ دے لوکاں نے کرونا خلاف تعاون کیتا تے حکومت نُوں سپور کیتا‘ اوہناں دا کہنا سی کہ سندھ سرکار دے جہناں 12 ارب رُپئے اخراجات دی گل کیتی جا رہی اے اوہ مختلف اقدامات لئی نیں‘ کرونا فنڈ دی نگرانی اِک کمیٹی کر رہی اے۔ سندھ وچ ڈھائی لکھ مستحق لوکاں نُوں راشن فراہم کیتا گیا اے‘ ریکارڈ موجود اے‘ اللہ دی مدد نال کرونا وایرس دی وباء اُتے کنٹرول پاواں گے‘ مراد علی شاہ نے کہیا کہ جہڑا کاروبار کھلے گا اوہناں دی ایس او پی ہووے گی‘ اسیں وفاقی حکومت نُوں کہیا کہ تُسیں سانوں ایس او پی دوو تاں جے ایہدے اُتے اپنا جواب دے سکیے‘ اسیں 4 صفحیاں دا خط جواب وچ لکھیا‘ کجھ صوبیاں دا خیال سی پلمبرز‘ الیکٹریشن‘ درزی‘ حجام کھلے رکھنے چاہید ینیں‘ اسیں کہیا کہ ایہ مشکل اے‘ بازار دے وچکار کجھ دکاناں کویں کھول سکدے آں‘ ایسں ایہدے اُتے اعتراض کیتا‘ اوہناں نے کہیا کہ آٹو موبائل انڈسٹری کھلنی چاہیدی اے پر اسیں اعتراض کیتا‘ جے لاک ڈاؤن ہووے گا تے درزی یاں نائی دے کول کوئی کیوں جاوے گا؟ سبھ نے اتفاق کیتا کہ آٹو موبائل انڈسٹری بند ہونی چاہیدی اے‘ اوہ ڈومیسٹک فلائیٹس کھولنا چاہندے سن پر ایہدے اُتے کجھ ہفتے تک بند رکھن اُتے اتفاق ہویا‘ ٹرانسپورٹ‘ انٹرا سٹی تے انٹر سٹی بند رکھن اُتے اتفاق کیتا گیا‘ مراد علی شاہ نے کہیا کہ برآمد کرن والیاں صنعتاں کھولن اُتے اتفاق ہویا اے پر ملازماں نُوں فیکٹری لیان لئی اپنی ٹرانسپورٹ دا بندوبست کرے گی‘ 3/1 بس وچ ملازمین ہون گے‘ فیکٹری دی گڈی وچ 40 دی گنجایش اے تے 15 توں ودھ لوک نہیں بَہ سکدے‘ فیکٹری والے ملازماں دی لسٹ دین گے جہناں نُوں لے رہے نیں‘ ہر انڈسٹری دی بس اُتے اوہدے ناں لکھیا ہووے گا‘ سماجی دوری نُوں یقینی بنایا جاوے گا‘ جتھے ملازم بُہتے ہون گے اوتھے ڈاکٹر ہووے گا‘ 55 سال تں ودھ عمر دے ملازمین ڈیوٹی اُتے نہیں آن گے‘ جے کوئی مشتبا روگی ہووے گا تے اوہدی فیکٹری والے اپنے خرچے اُتے ٹیسٹ کرن گے‘ چیف سیکریٹری فیکٹری والیاں نال اجلاس کرے گا‘ جدوں سارے طریقا کار اُتے اسیں مطمئن ہوواں گے تے فیکٹری کھولن دی اجازت دواں گے‘ وزیر اعلا نے ہور کہیا کہ سندھ حکومت وچ جنی جان اے میں ایس او پی اُتے عمل کراواں گا‘ سارے صوبے ایہناں ایس او پیز اُتے بہترین کم کر رہے نیں‘ اسیں لوکاں دی جان بچانی اے‘ وزیراعظم جدوں چاہن سندھ آن پر درخاست اے کہ مجمع نُوں نال نہ لیان‘ بغیر پروٹوکول جدوں چاہن آن ویلکم کراں گے‘ وزیراعظم سندھ سرکار دے ایس او پیز اُتے عمل کر کے سندھ دا دورا کر سکدے نیں۔