امریکی صدر نے جگت پدھر تے کم کردے عالمی ادارا صحت دے فنڈ روک دِتے،امریکا نوں کرونا بارے پہلاں جانکاری کیوں نہ دِتی؟۔۔۔۔٭رویل نیوز٭

واشنگٹن (نمائندا رویل) امریکی صدر نے عالمی ادارا صحت دی فنڈنگ روکن دا اعلان کر دِتا۔ وائٹ ہاؤس وچ پریس کانفرنس کردیاں ہویاں امریکی صدر ڈونلڈ ٹرمپ نے کہیا کہ اوہ انتظامیا نُوں ڈبلیو ایچ او دے فنڈز روکن دی ہدایت کر رہے نیں۔ اوہناں نے کہیا کہ ایہ فنڈز اوس ویلے تک روکے جان گے جدوں تک کرونا وایرس دے کھلار نُوں لُکاون تے بد انتظامی بارے عالمی ادارا صحت دے کردار دا جایزا نہیں لے لیا جاندا۔ امریکی صدر ٹرمپ دا کہنا اے کہ ڈبلیو ایچ او نے امریکا وچ کرونا دی وباء بارے شفافیت نہیں وکھائی۔ اوہناں نے ہور کہیا کہ ہُن ایس گل اُتے غور کراں گے کہ ڈبلیو ایچ او نُوں دِتی جان والی ساری رقم دا کیہ کیتا جاوے۔ ڈونلڈ ٹرمپ دا ایہ وی کہنا اے کہ امریکا دا فرض اے کہ اوہ ورلڈ ہیلتھ آرگنائزیشن دے مکمل احتساب لئی اصرار کرے۔ اوہناں دا کہنا سی کہ عالمی ادارا صحت اپنے بنیادی فرض دی ادائیگی وچ ناکام رہیا ایس لئی ایہنوں ذمے دار ٹھہرایا جانا چاہیدا اے۔ امریکی صدر دا کہنا سی کہ جے عالمی ادارا صحت نے طبی ماہرین نُوں گھل کے صورتحال دا جایزا لین دا اپنا فرض انجام دِتا ہوندا تے وایرس دے حوالے توں چین دی شفافیت اُتے سوالات چُکے ہوندے تے ایس وایرس نُوں کھلرن توں روک کے کئی ہزاراں بندیاں نُوں مَرن تے عالمی معیشت نُوں تباہی توں بچایا جا سکدا سی۔ امریکی صدر نے کہیا کہ میں اپنی انتظامیا نُوں ہدایت کر رہیا آں کہ اوہ عالمی ادارا صحت دی فنڈنگ روک دین تے ڈبلیو ایچ او دے کردار دا جایزا لین جہنے انتہائی بد انتظامی کیتی تے کرونا وایرس دے کھلار نُوں لُکایا۔ غیرملی ایجنسی مطابق امریکا نے غفلت ورتن دا الزام لاندیاں ہویاں عالمی اداارا صحت وچ بنیادی تبدیلی دا وی عندیا دے دِتا اے۔ ایس ضمن وچ امریکی وزیر خارجا مائیک پومپیو نے اِک بیان وچ کہیا کہ ڈبلیو ایچ او نے ماضی وچ چنگا کم کیتا پر ایس وار اوہ اپنا بھرواں کردار ادا نہیں کر سکیا۔