کل راتیں

کل راتیں

توقیر چغتائی

کل راتیں میں مَر چلیا ساں

اچن چیتی بیٹھے بیٹھے

خورے کیہ ہو یا سی مینوں

اُٹھ کے تیرے گھر چلیا ساں

تیری خیر خبر نہیں آئی ڈر چلیا ساں

کل راتیں میں مَر چلیا ساں

پِچھلے کجھ دِناں توں اپنا گھر بھُلیا سی

تے تیرا وی دَر بھُلیا سی

بھُل بھلیکھے خورے کس کس دَر چلیا ساں

کل راتیں میں مَر چلیا ساں

آل دوالے ڈوہنگیاں ندیاں

بدنامی دیاں کالیاں صدیاں

ساریاں ندیاں تَر چلیا ساں

ساری صدیاں سَر چلیا ساں

کل راتیں میں مَر چلیا ساں

کِنے لوکی وچھڑے ہوسن

کِنے لوکی روئے ہوسن

پر اسیں تاں ملے نہ وچھڑے

نہ گل لگ کے روئے

نہ موئے

ساریاں گلاں سوچ کے میں تے ڈر چلیا ساں

کل راتیں میں مَر چلیا ساں

٭٭٭٭٭