حفاظتی سامان دی تیجی کھیپ صوبئاں نوں گھلی جاوے،محدود سطح تے کاروبار کرن دی پابندی ختم،نویں حکمت عملی دا مُڈھ رکھیا جاوے:وزیر اعظم دی اگوائی ہیٹھ اجلاس۔۔۔۔٭رویل نیوز٭

اسلام آباد (بیورو رپورٹ) وزیراعظم عمران خان نے کہیا اے کہ عام بندے دیاں اوکڑاں نُوں ساہمنے رکھدیاں ہویاں حکومت نے محدود کاروباری سرگرمیاں دی اجازت دِتی اے۔ وزیراعظم عمران خان دی صدارت ہیٹھ کرونا دی صورتحال دے حوالے توں اجلاس ہویا‘ جہدے وچ وزیر برائے منصوبا بندی اسد عمر نے نیشنل کمانڈ اینڈ اپریشن سینٹر دے اج دے اجلاس دے بارے وچ بریفنگ دِتی‘ چیئرمین این ڈی ایم نے کرونا وایرس دی روک تھام دے حوالے توں حفاظتی انتظامات تے خصوصن ہسپتالاں وچ حفاظتی سامان دی ترسیل دے بارے وچ اگاہ کیتا تے دَسیا کہ حفاظتی سامان دی تیجی کھیپ کل صوبیاں نُوں گھل دِتی جاوے گی۔ وزیراعظم عمران خان دا کہنا سی کہ کرونا وایرس بارے درست ڈیٹا تے معلومات اُتے خصوصی توجا دِتی جاوے تاں جے صحیح آنکڑے اُتے مبنی ڈیٹا دی بنیاد اُتے حکمت عملی اختیار کیتی جاوے‘ مَوتاں دے حو الے توں ایس امر دا تعین کیتا جاوے کہ ایہ کرونا کیس سی یاں کسے ہور وجھاں دی بنیاد اُتے مَوت واقع ہوئی۔ ویراعظم نے کہیا کہ عام بندے دیاں اوکڑاں نُوں ساہمنے رکھدیاں ہویاں حکومت نے محدود کاروباری سرگرمیاں دی اجازت دِتی‘ پر ایس ضمن وچ ضروری اے کہ ہر بندا اپنی ذمے داری دا احساس کرے تے جتھوں تک ممن ہو سکے سماجی فاصلے نُوں یقینی بناء‘ جتھے بندے جمع ہون اوتھے ماسک تے ہور تدبیراں اختیار کیتیاں جان۔ تاں جے وایرس دی ترسیل نُوں ممکنا حد تک روکیا جا سکے۔ اجلاس وچ فیصلا کیتا گیا کہ اسلام آباد وچ 250 بستریاں اُتے مشتمل ایف ڈبلیو او ولوں قایم کیتے جان والے وبائی روگاں دے ہسپتال تے قرنطینا سنٹر دی طرز اُتے ملک دے ہور شہراں وچ وی ایسے طرحاں دے سنر بنائے جان گے۔ وزیراعظم نے کہیا کہ کرونا وباء خلاف جاری ایس جنگ وچ پوری قوم ڈاکٹر‘ پیرا میڈکس تے ہور میڈیکل سٹاف دیاں خدمتاں نُوں خراجِ تحسین پیش کردی اے جہڑے ایس وباء دے خلاف ہر اول دستا بن کے اپنیاں خدمتاں سر انجام دے رہے نیں۔