میٹرک تے انٹرمیڈیٹ دے امتحاناں دا شیڈول جاری۔۔۔۔٭رویل نیوز٭

راولپنڈی (نمائندا رویل) پنجاب بورڈ کمیٹی آف چیئرمین نے پورے صوبے وچ میٹرک تے انٹر میڈیٹ دے سالانا پرچیاں دا نواں شیڈول جاری کر دِتا اے۔ پنجاب بورڈ کمیٹی آف چیئرمین ولوں جاری کردا چٹھی دے مطابق میٹرک تے انٹرمیڈیٹ دوہاں دے پریکٹیکلز نہیں ہون گے سگوں صرف تھیوری پرچیاں دا سینٹر لائزڈمارکنگ نظام وی تبدیل کر دِتا گیا اے تے ہُن وکھری مارکنگ ہووے گی۔ پورے صوبے دے سارے تعلیمی بورڈز نُوں ہدایت کیتی گئی اے کہ شیڈول دے تحت پرچیاں دیاں تیاریاں شروع کر دین پر 4 جون تک کرونا وایرس ختم نہ ہویا تے ایہ شیڈول منسوخ سمجھیا جاوے گا۔ چٹھی مطابق 10 ویں دے سالانا پرچے مکمل ہو چکے نیں‘ ایس لئی ایہدے نتیجے دا اعلان جولائی دے تیجے ہفتے ہووے گا۔ 9 ویں کلاس تھیوری پرچے 18 جون توں 27 جون تک ہون گے تے نتیجے دا اعلان ستمبر دے پہلے ہفتے ہووے گا۔ انٹر میڈیٹ سیکنڈ ائر دے پرچے 29 جون توں 27 جولائی دے وچکار ہون گے تے نتیجے دا اعلا ن ستمبر دے دوجے ہفتے ہووے گا۔ ایسے طرحاں فرسٹ ائر دے پرچے 10 جولائی توں 20 جولائی ہون گے‘ نتیجے دا اعلان اکتوبر دے پہلے ہفتے ہووے گا۔