سٹیٹ بینک آف پاکستان نے شرح سُود  دو فیصد  گھٹ کر دِتی گئی۔۔۔۔۔٭ رویل نیوز٭

کراچی (نیوز ڈیسک) سٹیٹ بینک آف پاکستان نے شرح سود وچ ہور 2 فیصد کمی کر دِتی‘ اِک مہینے دوران ایہ تیجی وار شرح سود وچ کمی کیتی گئی اے۔ سٹیٹ بینک ولوں جاری ہون والے بیان وچ کہیا گیا اے کہ شرح سود وچ ہور 200 بیسس پوائنٹس کمی دا فیصلا کیتا گیا اے تے مرکزی بینک نے شرح سود وچ 2 فیصد کمی کر دِتی اے جہدے بعد شرح سود 11 فیصد توں گھٹ ہو کے 9 فیصد ہو گئی اے۔ سٹیٹ بینک نے عالمی مالیاتی اداریاں دے اندازیاں دی توثیق کردیاں ہویاں کہیا اے کہ چالو مالی سال پاکستان دی مجموعی قومی پیدوار دی شرح نمو منفی 1.5 فیصد رہوے گی تے اگلے مالی سال دی ڈی پی وچ 2 فیصد وادھا متوقع اے‘ جد کہ چالو مالی ورھے مہنگائی دی شرح 11 توں 12 فیصد رہوے گی جہڑی اگلے مالی سال وچ گھٹ ہو کے 7 توں 9 فیصد رہوے گی۔ اعلامیے وچ ہور کہیا گیا کہ مہنگائی دی توقعات تے شرح نمو وچ کمی کارن اج مانیٹری پالیسی کمیٹی دا مننا اے کہ شرح سود وچ کمی نال کرونا وایرس دی وجھا توں ہون والی بیروزگاری‘ مہنگائی اُتے قابو پان وچ مدد ملے گی تے معاشی استحکام دے نال نال گھریلو صارفین تے کمپنیاں اُتے قوت خرید تے قرض دا بھار گھٹ کرن وچ مدد ملے گی۔ مانیٹری پالیسی کمیٹی نے کہیا کہ شرح سود وچ کمی سنے سٹیٹ بینک ولوں کیتے گئے ہور اقدامات نال مدد ملے گی مثلن رعایتی شرح سود اُتے کمپنیاں نُوں قرض دی فراہمی‘ بنیادی رقم دی ادائیگی وچ اِک سال دا وادھا‘ قرض دی ادائیگی دی مدت 90 دن توں ودھا کے 180 دن کرنا‘ کرونا وایرس نال نبڑن لئی ہسپتالاں نوں گھٹ شرح سود اُتے قرض دی فراہمی کیتی گئی تاں جے ایہ ایس بحرانی صورتحال وچ اپنے ملازماں نُوں نوکریاں توں نہ کڈھن۔ مانیٹری پالیسی کمیٹی دے اجلاس وچ جایزا لیا گیا کہ مقامی سطح اُتے سرگرمیاں دے اشاریاں مثلن ریٹیل سیلز‘ کریڈٹ کارڈ دے اخراجات‘ سیمنٹ دی پیدا وار‘ برآمدی آرڈرز‘ ٹیکس جمع کرنا تے ہور ایس گل ول اشارا کردے نیں کہ معیشت حالیا ہفتیاں وچ سست روی دا شکار ہوئی اے۔ پر مہنگائی دی گل کیتی جاوے تے مارچ تے اپریل دے انڈیکس دے مطابق مہنگائی دے رجحان وچ کمی ویکھی گئی اے۔ سیٹ بینک دے مطابق کرونا وایرس دے دورانیے دی وجھا توں غیر یقینی صورتہال انتہا نُوں پہنچی ہوئی اے تے شرح سود وچ کمی دے کارن مہنگائی وچ وادھے دا خطرا اے۔ اجلاس وچ کہیا گیا کہ مالی سال 2020 وچ معیشت دے ہور 1.5 فیصد سنگڑن دا خطرا اے جہدے بعد مالی سال 2021 وچ 2 فیصد بہتری دا امکان اے۔ مانیٹری پالیسی نے دھرُکو ظاہر کیتا اے کہ شیواں دی ترسیل نہ ہون یاں ایہدے وچ رکاوٹ دے نتیجے وچ کھان پین دیاں شیواں دیاں قیمتاں وچ وادھے تے مہنگائی دا دھرُکو اے البتا معیشت دی کمزوری حالت دی وجھا توں ایہ دوجے مرحلے وچ سنگین اثرات جاری کرن توں قاصر رہن گے۔